(وكل الاهل من جهة مياري ومن جهة سارة معلنين حالة طواريء يوم الاثنين ملجة سارة ويوم الخميس ملجة مياري ..ويوم الاحد على صلاة العصر كان راكان منسدح )
راكان: آآآخ ياالدنيا ..الدنيا دوارة ربيعي اقرب الناس لي يخونني وياخذ حبيبتي؟ يزاك عند الله يافيصل !!يزاك عند الله !! الله يسامحكم جميع !!انا احترق ومحد مفتكر !!
(دش عليه ابوه )
بوراكان: ابويه مشغول؟
راكان: لايابويه اقرب!! (ويلس ابوه مجابلنه)
بوراكان: ابا اتخبرك .. وين مكانة اهلك؟
راكان: يابويه شو هالسؤال يطول لي بعمرك ؟
بوراكان منفعل: جاوب عسب اقولك ..
راكان: في القلب والعين والراس..
بوراكان: ولو استوا بي شي؟
راكان: عوذبالله لا تقول جذيه!!
بوراكان: زين انك ذكرت ربك !!لانك من دريت انه مارية مابغتك وانته هاد صلاتك وغادي شرا المينون...
راكان: ماعرف شو اقولك ..
بوراكان: تبا ترضيني انا وامك؟ ها؟؟ اذكر ربك وصل كل فرض مثل ماعودناك ..انته تبا تنساها؟
راكان: اكيد..
بوراكان: مب بزواجك !! لانه انا وصلني شي اليوم خلاني انزل راسي وماعرف وين اودي ويهي من العرب..
راكان: إشوووه؟
(بوراكان بطل تيلفونه وراواه الرقم)
بوراكان: تعرف هالرقم؟(وراكان يطالع الرقم)
راكان: لا ما اعرفه بلاه؟
بوراكان: فج على الصور ..وطالع الصورة اللي مطرشينها (يوم فج الصور)
راكان منفعل: هذي صورة؟ صووووووورة سارة!!! كيف؟؟؟ ووووووووووو
(بعدين استنتج انها تكلم حد وطرشت له صورتها ..بس خوّن بها .. بس هذا الادمي اللي طرش الصورة فتح عيونهم على اشياء مدسوسة فهالبنية ..والمشكلة انه هذا ربيعه اللي سرق الصور من تيلفونها وطرش لها فيروس على تيلفونها ..وطرشهن لبوراكان)
بوراكان اتخذ القرار:انا برمس ابوها انه الملجة مابتصير..
راكان والغصة فيه: شورك وهداية الله
بوراكان: انته ليش متغصص؟ ها؟ لازم تحمد ربك انه ماكملت طريجك وياها...وانه الله فكك منها انته اصلا ماتواطنها بعيشة الله..عمرك يابويه مابتندم ..الحينه سير اتمسح وسير صل في المسيد ...(وعطاه مصحف) امسك هذا مصحف ...اقرا كم من آية ..مب شرط اجزاء ..كم من آية عسب ينشرح صدرك..وشوف عقب نفسيتك كيف بترتاح..
راكان: مصحف؟(وياخذ عنه)
بوراكان: هيه مصحف ..اللي على ما اظن ماتعرف شكله ..اقراه وطالع كيف بينشرح صدرك ..
(وروح عنه ..وسار علم اهل سارة وحزتها حسوا اهلها بغصة وانتشر الخبر في الفريج ..اما مياري يوم درت سكتت مارامت تقول شي ..بس ماخلت هالشي يزعجها ..سارت واتزهبت حق الملجة ولا عليها من سارة ..اما راكان سار يصلي في المسيد وقرا كم من آية وحس انه الجبال اللي كانت على جتوفه انهارن كلهن وروح البيت وحط راسه ونام ..اول مرة يرتاح ...اما عند سارة)
سارة تصيح: انا يسوي فية جذيه؟ انا؟ ليش؟ (وتتصل عليه) الله يغربله مايرد !! رد !!ياراكانووه رد!!!
(وطرشت له مسجات سب وشتايم ماخلت شي عنه ..رد عليها بمسج " الله يسامحج ويستر عليج" وصورها انتشرت في النت ..وبين الشباب والبنات ..لين وصلت لإيد شخص محد يتمنى انه يوصل عنده واللي هو ابراهيم ..من درا ماعرف وين يضرب براسه غدا شرا المينون ..وسار لها البيت ..وهي كانت فنفس الوقت قافلة على عمرها وتصيح ماتفكر بشعور راكان ..بس كان تفكيرها بفضيحتها .. واللي كل الاهل والقرايب اكيد يدروبها )
صوت من حجرتها يرمسها: يالله على شماتتهم فيج ..الغيرة كلتهم بسس انج جميلة وغاوية والكل حاسدنج على جمالج الطاغي ..الجمال الرباني الله وهبج ..يالله الناس حسودة لهالدرجة؟...اصلا انتي لازم ماتهتمين اذا مايباج جهنم كلته ..اصلا شيوخ وتجار يتمنونج .. اختاري... ماعليج ..بس لازم تسوين شي يخليه يندم انه ما خذاج ..هذا اكيد من ام السعف والليف مياري.. حد غيرها؟؟ الممثلة العودة ؟ هذي بتاخذ الاوسكار على تمثيلها الدرامي ..ولا عاد راكانوه الخايس ..جيه؟ يتحراج مياري عسب يسوي فيج حركة خساس؟ ويفضحج جدام الخلق؟ والله انا لو بدالج جان سرت له وشرشحته جدام والدين والدينه وخليته مول مايسوى بيزة !!!
(وفجأة ابراهيم يدق الباب ويختفي الصوت)
ابراهيم: فجي الباب !! فجي الباب لاكسره على راسج !!! (وحست قلبها بيطلع ..ويلست عند الباب تسمع)
ام سارة: ابراهيم استهدى بالله ..دخيل ربك استهدى بالله!!
ابراهيم: فجي الباب يالحقيرة !!!فجي لابركتن فيج !!(ويرفس الباب بس ماشي فايدة)
سارة تصارخ: هب فاجة !!
ابراهيم: بتفجين وريلج فوق رقبتج يالجلبة!!
سارة تصارخ أزيد: هب فــــــــــــــاجة !! سير عند راكانووه !!هو اللي قال ما يباني!!
ام سارة: اعصابك يا ابراهيم..
ابراهيم يدزها بعيد ويصارخ: والله لأييب اجلج يا سارووه !!انفضحنا!! سيري طاعي صورج منتشرة في البلاد وفي الانترنت !!بنتج نزلت راسنا !!عرفتي ليش راكانووه مايباها !!سواد ويه!! عرفتي !!سود الله ويهج!!
(وبعد ربع ساعة من رفس الباب والصريخ والزعيج .. والسب والشتيم ..طلع من البيت وهو متوعد انه بيذبحها ..وهي تصيح وتصارخ على فضيحتها تمت ما تاكل شي ولا تتسبح .. وشعرها مكشش وطرشت لها سارة اللي راكان مالج عليها قبل ..طرشت لها صور منتشرة وكانت تتشمت عليها.. اول ماسمعت التيلفون ..تمت مكانها ..حاولوا وياها اهلها بس ما شي فايدة يأس في يأس ..كانت تصارخ في الليل ..وتتكلم ويا عمرها كأنها تكلم حد موجود وياها ..وتسب مياري وراكان وفيصل وكل اللي تعرفت عليهم ..لين قامت وفجت التيلفون ..كان ملصقين صورت ويهها على صورة جسم بنية من الصور الاباحية ..وصرخت صرخة من خاطرها واتخبلت ..اما ابوها عافها وكل ما يحاول يطردها من البيت كانت حرمته ام سارة توقفه وماترضى ...ويوم الاربعاء.. كانت مياري تكلم العنود)
مياري: يالله عنودوه شو رايج؟
العنود: لاتحاولين ويايه ..وانتي!! بزوالج اذا سرتي!! والله بعمرج!!
مياري: حرام غمضتني..سمعت من اميه اليوم انها بيودونها مستشفى الامل ..
العنود: زين الله يراويها باللي تسويه ..
مياري: حرام تتشمتين غلط!!
العنود: انا ما اتشمت ..بس البنية اللي تعجني في ورطة ..لا اقرب صوبها ولا شي ..خليني بعيد عنها..
مياري: انتي جيه رايج؟
العنود: طبعا ..ولاتبين فيصل ياخذ عنج فكرة؟
مياري: تف من حلجج!!
|