عسى ما ازعلتك البارح
وزودت الجراح جراح ؟!
عسى ما مرت الدمعة على أهدابك
من أسبابي ! ..........
جرحتك من كثر شوقي و خليت الكلام رماح
ولاأدري شلون ياعمري
طعنتك حيل بعتابي ؟!
بدون شعور صدقني ترى كثر الغلا ذباح
تعال وشوف بغيابك غلاك شلون سوا بي
حرام تغيب من عمري
وتعطيني الفراق وشاح
حرام الدمع في عيني مناديله في أهدابي
غيابك يشغل عيون الزوايا .. و امتلي أشباح
وانا أنثر صوتك بقلب المكان
وأشعل أبوابي !
تلفت للأمل دام الرجا في عمري الملواح
أناديلك ولو شرهة وصولك تقطع أعصابي
أبيك الجاي من عمري أنا ماأبيك شي وراح
مدامك أجمل وآخر .. مدامك أجمل أحبابي
أبي أرتاح يا عمري
أنا أدري هَم تبي ترتاح
تعال و قبل ما أفرح ترى تفرح بك ثيابي
أحبك أحبك يا بعد عمر الحزن والجرح والأفراح
أحبك كثر ما نامت عيونك داخل أهدابي
|