يوم اسْألتني قالت من انت ومنين = دار الحديث وطال معها نقاشي
وناظرت فيها نظرة العين للعين = واخفيت عنها حيرتي واندهاشي
طفله بعد ماتمّمت عشرة سْنين = منطوقها يروي الكبود العطاشي
في وجهها بدرٍ جمع ورد مع تين = منور حلاه ولاغشاه الغباشي
والشعر ليل ٍ لافترق صار ليلين = مسترسل ٍ مابان فيه انكماشي
والعين عين اللي كفخ بالجناحين = عين اشقر ٍ ماطاوع لكف لاشي
قلت اسمعيني ياورود الرياحين = أنا غريب ولاظلم الليل ماشي
أنا بدوي ٍ يعشق البل والظين = وبماكر اهل العز باسط فراشي
أسوق ركبي مع رجال ٍ وفيين = وانا لربعي مثل في الغواشي
في لازمي يابنت ماقلت بعدين = وبلازمي يابنت ياقو جاشي
ماني خوي اللي عن الحق غاوين = أهل الخنا واهل العلوم الهشاشي
وان عذربوا فيني من القل واشين = ماجيت اساير كل نمّام واشي
الفقر ماعذرب رجالٍ عزيزين = لو يسكنون خيام والا عشاشي
والمال مايرفع نفوس الرديين = لو مالهم يملا كبار الخياشي
قالت وفيت وقلت ابسألك ذلحين = منهم خوالك ؟ والا اقلك .. بلاشي
قالت بقول مثمن العلنم تثمين = خالي فلان وعجلت بارْتباشي
قلت اكتفيت وعقبها لاتقولين = على عيوني مثل حوم الفراشي
واقفيت مثل اللي غلط بالعناوين = يبغا يكحلها وصابه طماشي
واللي تبيّن لي ولاحتاج تبيين = شي ٍ قديم وكنت عنه متحاشي
البنت هذي واظمن العلم تظمين = بنت الهنوف اللي بها الفكر طاشي
اللي أشبهها بورد البساتين = من عطرها الباهي يزيد انتعاشي
واللي خطاويها على العرف والدين = واللي طرفها بالعدر مايناشي
واللي غلاها ساكن ٍ بين ضلعين = واللي بطاريها يزيد ارتعاشي
عنها حدوني جامعين الملايين = وانا خذلني في هواها معاشي
قفّوبها عني ضحى يوم الاثنين = وانا دموعي مثل وبل الرشاشي
وحسبي على اللي فرقوا بين قلبين = حتى غشا قلبي من الهم غاشي
{أغيب}
وآخذ ليْ مع الوقت وقفآت ..........
, ويبقى \غلاكم/ بـ خ ــآفــقيْ
(= مآ نسيته....
|
|