أهلا بك ومرحبا يا هدى..
السـْوال عليك ويسال عليك الخير يا هدى وغادي نجاوبك على أسئلة رسالتك المفتوحة،
Malgré راني نقول هذا المخلوقة (هدى) وين وين شايفها ولحد الآن ما زالني ناسي !
ما تلومينيش، راكي عارفة حالة الشيوخة كيكبروا يخرفوا!
وخوك البريء، (لاكاركاس jeune، والموتور شيخ !)
::
::
::
كيف الحال والأحوال ؟
::
"الحال" راهو لاباس ويسلم عليك بزاف بزاف،
لكن "الأحوال"، عندي مدة ما شفتهاش !! وقيلة راهي مريضة ودخلت السبيطار !
وكـِ تكون "الصحة" لاباس، "la santé " آش ديري بيها ؟!
الحمد لله على كل حال.. نحمدوه بلا مزيتنا..
::
::
::
أين أنت ؟؟
::
هاذ اليامات راني هامل وموّدر ونهار كامل وانا ندقلل ف الزْنق !
ياك راني غير قدامكم ولو كان تعيطي نسمعك !
لعنداك راني مخبي ف الدار باش ما تضربنيش الشمس !
::
::
::
صار لنا زمان ما تلاقينا ؟
::
شفتي ؟ خاوة وجيران وما يتلاقاوش لا في اعراس ولا في زردات !
- انتيا ما حبيتيش تعرضيني !-
انجي بْلا عرضة ؟
صح عندنا زمان ما تلاقيناش.. بصح قلتلك ف وحد النهار (إلا راكي شافية) بللي غير لجبال اللي ما تتلاقاش !
وكيما يقولوا ناس زمان : "الحي قاع يتلاقى !"..
::
صار هاذي غيبة ؟!
::
الغيبة يا بنت الحومة من عندي ومن عندك ! رانا كامل ف شكارة وحدة !
واللي يسمعك تهدري يقول راكي دايرة "طـْريق النـْمل على خوك البريء" !
::
::
::
مبروك عليك هذا الشهر العظيم الله يدخلو عليك بالخير أنت وجميع المسلمين والمسلمات
::
الله يسلمك يا اختي ورمضان كريم لنا جميعا والله أكرم..
قالك واحد يسميوه البريء قال لاختو هدى: " شفتي سيدنا – رمضان- اشحال مليح (مزيان)..؟"
فردت عليه وقالتلو: " حتى سيدنا - الفـْطار- ما عندنا ما نقولوا فيه !"
::
::
::
عرفتي أنا ورمضان موالمين وخصوصا أنه تزامن مع سبتمبر
هما من أفضل الأشهر لدي
الأول لأنه شهر العبادة والثاني لأنه الشهر الذي ولدت به
::
::
::
على بالي بللي زايدة ف الخريف وم الصباح وانت تشرّيلي وتقيسيلي ف المعاني !
خلاص فهمنا.. و يا سيدي مبروك الشمعة الجديدة.. انشا الله تضّوي عليك حياتك في طاعة الرحمن..
ما تنسايش بللي انتِ كبيرة عليّ بعشر ايام !
::
::
::
الله يبارك لك ف الوالدة تهلاوا فبعضكم
::
الله يبارك فيك وف الوالدين ديالك .. وانشا الله يتهلا فينا ربي سبحانه – كوني مْهنية -..
::
::
سلملي عليها بزاف
::
الله يسلمك.. سلامك يبلغ وانت ثانيت سلميلي على الأهل كبير وصغير..
::
::
::
والزلابية هي الحلوى المفضلة عندي وغادي نكثر منها
::
على بالي لو كان عمي "بابات هدى" ما يجيبش معاه الزلابية .. هاذاك النهار نهارو وتولي تبكي وتزعفي وتبقاي بلا فطور و..و..!!
::
::
راني نتمانلك من قلبي في كاش نهار تفطري بالبطاطا المقلية (الفريت) والسردين المالح وتختميها بالزلابية وما تفطنيش للسحور وما تشربيش الما !
وتتحرحري بالعطش ف النهار حتى يخرج لسانك !
هكذا باش ما تزيديش تكثري م الزلابية وتنذعري !
::
بصح نسيتي ما قلتيليش بللي تحبي القازوز بزاف !
::
العرض العادي
المواضيع المتشابهه
