يوميات شحطه (5)
السلام عليكم ورحمة الله وبركاته ..
أخر عرض لأخر يوم من يوميات شحطة ...هو اليوم الخامس والأخير ..
أتمنى لكم قضاء أطيب الأوقات ...والسموحة اذا أخطأنا على حد ...
كالعادة نهضت شحطه الصبح تريقت وراحت تريض الباص .... بس الغربية انها ماحصلت عويش ...
جا خميس وركبت شحطة الباص وهي تفكر في السبب بو خلا عويش تتاخر ...وصلت المدرسة خاص الدوام بس عويش ما ظهرت ....
رجعت شحطة البيت وعلى طول راحت تتصل ببيت عويش تسأل عنها ...ورد عليها (اخو عويش) شامس..وصار الحوار التالي :
شحطة : السلام عليكم
شامس: وعليكم السلام
شحطة : أنا شحطة ربيعة عويش .. متصله أسأل عنها
شامس : عويش في المستشفي لاه
شحطة منتزقه: مو هناك مو مستوي
شامس : ترى اليوم موعد العملية بو حالها
شحطة : مو من العمليات ..هي ما قالت لي
شامس: مااعرف أوين صغير بعدني ماافهم ،، لكنها عمليه خطيرة
شحطه : أوههووووو ماعندي خبر ...انزين أي مستشفي ؟؟
سجلت شحطة اسم المستشفى والقسم ورقم الغرفة ...وراحت عند أخوها حمدان علشان يوصلها العصر المستشفي تزور عويش ...
وفي الطريق ..
حمدان : ما تتأخري واجد أنا عندي شغل
شحطة : مو شغل أحيدك عاد جاااي ؟!
حمدان : مواعد رباعتي نروح نشوح في الشارع الجديد ..
شحطه : لا اله الا الله انته ماتوب عن ذي السوالف ؟! مازين ياخوي حنوه محتاجينك
حمدان: نوبة أنا محتاجنكم ...لكن يعني مو ايستوي ...كم مرة عاد نشوح وما يستويلنا شي
شحطه : هيه ياخوي لكن ترى مادايما تسلم الجره والاية الكريمه تقول (ولا تلقوا بأيدكم إلى التهلكة)
حمدان يغير الموضوع : أنا اعرف محل يبيع ورود مو رايش تشليلها باقة انتي ورايحه
شحطة: غاوي والله ..خلى ..
دخلوا المحل واختاروا الورد وطلعوا بسرعة علشان تلحق تشوف ربيعتها
...شحطه كانت تفكر في حال عويش وتتمنى تشوفها قبل عن تدخل غرفة العمليات
...مسكينة خيفانه على ربيعتها مع انها كانت زعلانه لان عويش ما خبرتها ...لكن حمدان قطع تفكير شحطة بسواقته الي ما ترحم ..
شحطة : شوية شويه حمدان عن تقتلنا
حمدان : تراني مواعد الشباب ما يستوي اتاخر
شحطة : تو انته ما تسمع الكلام ...أموه باغي تبيع عمرك؟
حمدان : ماابيع عمري ...قلتلش ما ايستوي شي ..تراها الا كم ساعة وبس
شحطة : اللهـــ يهديك ...ما حد يعلم الغيب يا حمدان ...ليق عن ذي السوالف وسمع الكلام
حمدان معصب : .. تراش طفرتيبي حشى ماتخلي حد في حاله ..انطمي عن تو اكرخش
شحطة : اللهـــ يهديك يا خوي العود ..ماعندنا حد غيرك في ذي الدنيا ...
حمدان : يالله يا كريم .....شكلش ما رايمة تسكتي انا اراويش
ويشوح بسيارة في الدوار ...وتنقلب ...تطلع روايح التواير وصوت الدقيق ...كما الفيلم الهندي بالضبط ...عاد انتو تخيلو وحدكم
تجمعوا الناس وحاولوا يطلعو شحطة وأخوها ..لكنهم كانوا في عداد الموتى
انا لله وانا اليه راجعون
..من الصوب الثاني وصل الخبر عند خلفان وسعيد اخوان شحطة ..ماراموا يتحموا الخبر وعقوا عمرهم من فوق السطح وماتوا ...
أما عويش فدخلوها غرفة العمليات ...لكن العملية فشلت وماتت ...والمصيبة الاكبر...حيانها يوم سمعوا الخبر ...جاتهم سكته قلبية وماتوا كلهم ...
خميس احترق هو والباص والمدرسة وكل الي فيها .....
لم يبقى في اليوميات الا تلك الرسائل التي لازالت مجهولة السر ...
ولا انسى باقة الزهور التي أصبحت من الماضي ...
اتت هنا لتحكي بعض من يوميات فتاة الدهس
(شحطة)
وفي الختام ..لا يسعنا الا ان نقول ...
(لا اله الا اللهـــ ...وانا لله وانا اليه راجعون)
النهــــــــــــــــــــــــــــــــــــــــــــــ ـــــــــــاية
أختكم زهور الماضي (orient)
فمان الله
|
يَقُول حكِيم يُونَانيّ:
كُنتُ أبكِي لأنّني أمشِي بِدون حِذاء
ولكِنّنِي تَوقّفت عَن البُكَاء!
عِندَمَا رأيتُ رَجُلاً بِلا قدَمين / [الرياح لا تحرك الجبال ولكنها تلعب بالرمال وتشكلها كما تشاء ]
|
|
العرض الشجري
المواضيع المتشابهه
