مستوياتنا إلى أين؟
مستوياتنا إلى أين؟!؟
بسم الله الرحمن الرحيم
في عصرنا اليوم نعايش الكثير من المتغيرات وكثير منها ما استطعنا التغلب عليها ومواجهتها بالطريقة الصحيحة ولكن وللأسف ثمة متغيرات لا تتلاءم أبدا مع الوضع الذي نعيشه ولا تتناسب مع استيعابنا لهذه الأحداث!!!
أخص الحديث هنا عن المناهج التي ندرسها والتي لم يكن لنا رأي في اختيارها هي قسرية من اختيارهم!
والتي أتت اختباراتها مرحلة جديدة لم نألفها وكانت صدمة بالنسبة لنا!
اللغة الإنجليزية(أ)
تم اختيارها مسبقا فعندما وصلتنا أوراق اختيار المواد نسمع معلمات التوجيه المهني:
"اختارن انجليزي ألف ماتختارن ب"
"أستاذه ليش وخاصه إذا كنا نريد ب(مساكين مانعرف شو ورا هالاختيار الاجباري)"
"ترا لازم ماشي خيار!!!"
بصراحه لاتعليق
نكمل السالفه
المنهج الله يسلمكم غني عن التعريف احيانا عنوان الوحده مانعرفه نروح نترجمه والغم لما الثيم بالكامل مافاهمين فكرته طيب خلونا من هذا هذي مجرد رؤوس أقلام القهر لما نفتح الصفحه نحاول نقرأ البراجراف كلمات معدوده نفهمها والبقيه ترا ربطي كلمه من البدايه والوسط والنهايه وانت وحظك فهمت مافهمت والله حاله طيب ماعليه لااا والإختبارات القصيره يالي يعطوج إياها كلها تحليل الصف الثاني عطوهم الإختبارات القصيره كلها تحليل، فهمي وبعدين حلي ع هذا الأساس والله حاله ترا بالعربي والمواد الثانيه زين نتقن هالشي لين نحصله فـ براجراف أساسا احنا مقادرين نفهمه !!!ومستوااااااااااااناااا ع وين وين بيوصلونا متعودين درجاتنا تسر النفس والحين !!نتمنى بس نحصل معدل زين!!تو بالله ذا حال
صح ذكرت كل شي سلبي بس النواحي الإيجابيه معدوده ومحدوده صحيح تنمي الفكر وتفتحه أفكار جديده وحديثه ومستوى عالي وكلمات مستوى مرتفع وشي زين بعد ينمي ذكاء الفرد وثقافته الكتب بشكل عام مسليه بس الي داخلها مضمونها وحالنا معها هو المشكله ياناس!!
طيب مامشكله هالشي ترا الاختبارات القصيره مشينا والدرجات زينه بس المأساه الحقيقيه الإختبارات الفاينل والي نهاية نصف الفصل حشا ماسنة اختبارات ...
الفصل الأول ع م أذكر أنه 10 بنات بس ناحجات بعد ناجحات ولله الحمد مانقول تميز لانه تقريبا كان من حق 3 بس!!!صراحه انصدمت يوم عرفت الخبر وترا شو يسوو اضطروا ينحجوا البقيه!!
الفصل الثاني فـ اللجان طالعات يصيحن مقادرات يحلن مفاهمات شي وطبعا لاتوضيح ولا حتى معنى كلمه حتى لو ما فوكابلري ماشي أمل يعني حتى الي معدلها كان أعلى شي الفصل السابق مقادره تحل والله حاااااله ليش كل هالشي
طيب أحنا مانحتج ع المنهج والدراسه أنا أتكلم عن النتايج
إذا النتايج مثل مايشوفوها ماتسر حد ليش يجيبوا اختبارات صعبه والمستوى مستوانا لوين بيوصلوه يعني حتى الـ90 صرنا نفتقد أيامها فهذي الماده وحتى لو جبناها فـ فصل واحد بيضيع الفصل الثاني!!!
يعني نقول المعدل بشكل عام للمدرسه داااااااااااااااااااون فالإنجيزي والحين!!
هل هذا هو الهدف من التعليم التعجيز تعجيز الطالب عن الحل تحديه وتحدي قدراته لماذا في وقت الإختبار ألم يجدوا وقت آخر لتحدينا في أسلوب التدريس أو ماشابه سنقبل به الأهم صون درجاتنا والتي عجزنا عن حفظها نتيجة لعدم تمكننا من الفهم أي حال هذا
هذا انجليزي وجابوا كذا الإختبار
ترا بعد مواد ثانيه معنا الكيميا يوم حتى الاختياري كله أخطاء وتأخروا لين صححوه والإختبار نااااااار صعب!!وانتوا وحظكم وطبعا الدرجات نااااااااازله ع الآخر وبنات الأدبي وعلوم وتقانه والي كله فهم للأحداث وربطها بالمنهج بإستثناء 5 أسئله مباشره !!
سأعيد الحديث عن الهدف من التعليم وهو خلق جيل واعي متعلم مثقف قادر على خوض التحديات في غمار الحياة وتجاوزها قادر على البناء بفكره المتوقد والمساهمة في بناء الوطن!!!
والحين إذا الإختبارات النهائيه صعبه مانقدر نستوعبها كيف نقدر نرتقي بأنفسنا فهالمجال متى بيجي اليوم الي بترد سعادتنا فيه ع الـ100 الي كنا نحصلها ترا احين صارت 80 عادي والرسوب منتشر ع الآخر وكالعاده يساعدوهم عشان يتخطوا الأزمه تو هالحال بيظل لين متى لين متى ترا تعقدنا من شي اسمه اختبارات كله من اختباراتهم حياتنا متلخبطه ع الآخر احلامنا اوقات فراغنا وقت أكلنا شربنا كله نستذكر الأسئله والدرجات وعدم مراعاة المعلمات بحجة الإختبار سهل!!!المشكله كلمة سهل مطاعت تدخل فراسي مقدر أكذب ع عقلي وابرمجه أنه الاختبار سهل إذا كنت أول مره أشوف هالأشكال !!!
والسؤال الحين:
- ما رأيكم في الإختبارات التي تقدم لمدراس التعليم الأساسي ؟
- هل هدف التعليم جاء مواتيا لما قدموه من إختبارات؟
- وماهو الهدف الحقيقي من اعطائنا اختبارات بهذا القدر من الصعوبه؟
- هل من حل لإختبارات اللغة الإنجليزيه حل يتناسب ولو بالقليل مع المستوى العام؟
- هل من أمل في التغيير وتحويل هذه الإختبارات وجعلها على المنوال الإعتيادي بحيث أن ثمة أسئله ذكاء والأغلبية متوسطه ومنها قليلة المستوى؟
أتمنى أن تشاركونا بآرائكم حول هذه القضية المنتشرة وبكثرة مؤخراً....
|
العرض العادي
المواضيع المتشابهه
