قلبك اللي كان يهواني تكبر((قصة كاملة))

[ رَسَائِل ..إلَى مَا لانِهَايَة..] ! (اخر مشاركة : الراجي - عددالردود : 706 - عددالزوار : 149749 ) » " الــــــــــراجي " لا تفسر كلماتي فهي مجرد حروف مركبه فقط *_ * (اخر مشاركة : الراجي - عددالردود : 827 - عددالزوار : 203543 ) » ســجـل حـضــورك بالصـلاة علـى النبي (اخر مشاركة : الراجي - عددالردود : 73 - عددالزوار : 52682 ) » تبليغ عن مشاركة بواسطة alaa_eg (اخر مشاركة : alaa_eg - عددالردود : 1 - عددالزوار : 2 ) » تبليغ عن مشاركة بواسطة alaa_eg (اخر مشاركة : alaa_eg - عددالردود : 0 - عددالزوار : 1 ) » تبليغ عن مشاركة بواسطة alaa_eg (اخر مشاركة : alaa_eg - عددالردود : 0 - عددالزوار : 1 ) » دعونا نـ ـلون جدراننـ ـا بضجيج أقـ ـلامنــا (اخر مشاركة : البريء - عددالردود : 2080 - عددالزوار : 251177 ) » سجل دخولك للقسم العام بـحـكـمـتـك لهذا اليوم (اخر مشاركة : البريء - عددالردود : 618 - عددالزوار : 136370 ) » سجل دخولك وخروجك بالاستغفار (اخر مشاركة : البريء - عددالردود : 81 - عددالزوار : 62659 ) » همسات قبل حلول شهر رمضآن المبارك .. (اخر مشاركة : البريء - عددالردود : 9 - عددالزوار : 44276 ) »


		منتديات حصن عمان

		منتديات حصن عمان > الأبراج الأدبية > برج المقال والقصة
قلبك اللي كان يهواني تكبر((قصة كاملة))

أدوات الموضوع

قلبك اللي كان يهواني تكبر((قصة كاملة))

22-01-2007

مؤهلاتك بالحصن

عدد نقاط تميزك بالحصن : 7265

المستوى :

عدد زياراتك للحصن:

عدد المرفقات :

الحالة :

!.. رسائلي ..!

من مواضيعي

0 علاج السمنه بالاعشاب
0 ليش قلبج يا بعد عمري حزين
0 مرض الاكزيما
0 رسالهـ من اخ إلى أختهـ
0 مسجات روعه<<من ذوقي لاتفوتكم هع

الاوسمة

مجموع الاوسمة: 5

قلبك اللي كان يهواني تكبر((قصة كاملة))

بكل طيبة العشاق اطلب نفترق
تعيش النفوس تعشق وتود ..فطره فطرنا الله عليها .. والفا بين قلوبنا بها..
عاشت حصه بين اخوانها واهلها وعمها وعيال عمها .. من يوم وهيه صغيره كانت حصه بنت عاقل رزينه الكل يشهد بأخلاقها وادبها ..
حصه انولدت بين اخوانها..عندها اختها الكبيره مريم واخوها الاكبر محمد و اصغر منها خالد وناصر وعبدالله بالترتيب..
عمها عبدالله من استواو وهم ييران... فلة ابو حصه (راشد) وفلة عمها (عبدالله )مطابجات ماامبينهم الا يدار واحد وفاجين باب بين الفلتين ..وعيالهم من استواو وهم اخواان اكلهم ولعبهم ودراستهم وحياتهم وحده وبعد في شي ثاني يجمع بينهم اكثر واكثر..!! حرمة عم حصه تستوي اخت امها لحصه..!!  يعني العايلتين مافيهم فجه.
بنات عم حصه روضه وظبيه توأم عمرهن من عمر حصه ..بناات في الثانويه العامه في نفس الصف .... حصه من يوم هيه اصغيره كعاداااتنا طبعا كانت محيره لعيال عمها... وموعود واحد من عيال عمها ابها من تخلص الثنويه العامه ..وطبعا عبدالله عم حصه يبى يفرح بعياله ويشوف اعيالهم ..وتقرر ان خليفه ولد عبدالله ياخذ حصه.. ومنو الي قرر هالشي ؟؟...عبدالله عم حصه وابوها طبعا .. بس محد شاور حصه ولا حد شاور خليفه ...والمقرر ان يكون عرسهم بعد ماتخلص حصه الثانويه العامه..!!
خلفيه ريال ونعم فيه خلص دراسته ورجع من استراليا من سنه ..وتوظف على طول ..
بس خليفه مافكر انه يعرس ولا حط في باله" حصه " لان كان الكلام ان واحد من الاخوان يتزوجها... بس مايعرفون منو.. احمد اخو خليفه اصغر منه عرس من سنتين وخالد يدرس في الجامعه .

بعد المغرب كانت حصه وظبيه وروضه يدرسن في ميلس بيت حصه .. دخل عليهن عم حصه عبدالله وسلم على البنات ..
عبدالله (بو خليفه): سلام عليكم ..
ماشالله على اليواري قطعتن الكتب ماتسوى عليكن هالدراسه ..باجر كل وحده منكن بتعرس وبتسير بيت ريلها ... خفن على عيونكن باجر بيصبح الريل يقودكن شرق غرب وانتن مااتدلن وين تحطن اريولكن.
ضحكن البنات على رمست بو خليفه ونشن يسلمن عليه
حصه: مرحبا الساع بالشيوخ ..
وايهت حصه عمها وحبته على راسه وبنات عمها بالمثل
سلمن على ابوهن وحبنه على راسه
يلس بو خليفه وياهن ويلسو يسولفون لين ما ياهم ابو محمد ..(ابو حصه).يلسو كلهم يميع
بو محمد: علومك بو خليفه ... وعلوم الرجاب..؟
بو خليفه : علوم الخير طال عمرك..والرجاب امبيضات الويه مب قاصر عليهن شي..و بنت صوغان بعناها بقيمه زينه .
روضه : الحين فجو موضوع الرجاب والبوش الله يعينا
بو محمد: هههههههههههه عنبوه ياروضه وشو بلاهن الرجاب والبوش اهلج ويدودتج عايشين عليهن وناكل ونشرب من خيرهن
بو خليفه: فديتن والله بوشي ورجابي حرام ان غلاتهن من غلات اعيالي
ضحكو كلهم على رمسة بو خليفه
حصه: عمي ترانا نغار ... لعنبوه استوينا انحن والبوش بنفس الغلا..!! هههههههه
ظبيه: لا وبشرج بعد حصوه ...البوش استون عدايل امايه ابويا يهتمبهن اكثر من ما يهتم ابحرمته هههههههه
بو محمد: لالا بوشنا وحريمنا واحد مانفرق امبينهن كلهن نفس الاهتمام.

حصه: هههههههههههههه ابويه انحن ماقلنالكم تعدلون امبين حريمكم وبين بوشكم هههههههه انحن نباكم تودرون هالبوش اشوي وتريحون عماركم.. ويشل كل واحد منكم عيوزه ويحوطبها ويفري عنها في لبنان وسوريا والا فرنسا ..هنوهن اشويه ههههههههه

روضه:يبالهن سيره لبنان فديت روحن يردن شبابهن شويه هههههههه
بو خليفه: وشو مستوي عليهن بنات مبارك بعدهن غزلان يتيولن كل وحده منهن لو تفجها في مركاض يابت الاول ماشالله عليهن.

بو محمد :لا لبنان ولافرنسا... بنوديهن طال عماركن العزبه يومين وبترد الصحه فيهن وبيشربن اللبن وبتهبهـن المهب وجان عـ هالشعرتين البيض بيحننهن وخلااااص.

ضحكن البنات على سوالفهم وقامن عنهم عسب يسيرن يخلصن ادروسهن
في الميلس.. فتح بو خليفه موضوع عرس خليفه وحصه
بو خليفه: بو محمد ترا ولديه خليفه طالبنك ..الريال يبى يعرس وانحن حصه بنتنا وولد عمها اولابها من الغريب ... والريال خلص الي عليه وجاهز بالي تطلبونه وحصه بنتنا مابنقصر عليها ابشي وبتظهر من بيت ابوها وبتحدر في بيت ابوها الثاني

بو محمد: الساع مابتحصل اخير من خليفه ولد عمها ورااابي وياها ..والبنت ماتبى عليه شي ولو يباها الحين يملج عليها ويشلها بكندورتها الي عليها .. افا عليك يا بو خليفه هاي بنتك .

بو خليفه: إلا حرام عليه اني اسويلهم عرس لا استوى ولابيستوي شراته.. واخلي الناس ترمس عنه دامنها حيه.. وحصه لو تبى اعيونا مابنبخلبهن عليها.

بو محمد: طولي الله بعمرك يابو خليفه.. مايهمنا المظاهر يابو خليفه ..المهم راحة اعيالنا والله يوفقهم ويهنيهم.

بو خليفه :امين يارب..طال عمرك بيت خليفه جاهز ماباقي الا الديكورات والسامان الباقي
وبنتنا من تخلص تزدهب ...هيه وخواتها وياها بيفازعنها والبيت من الحين تحت امرها تعدله على ماتهوى نفسها وخليفه تحت امرها وين ماتبى بيوصلها.

بو محمد: الي تامر به بيستوي طال عمرك.. ولو بتخلينا على هوانا هذا كله ماله لازم خفو على عماركم والتبذير ماله داعي هاي نعمه تبى من يحفظها.

بو خليفه: طال عمرك انا الي عندي والي ورايه و دوني كله لخليفه وخوانه ودامني حي ماببخل عليهم ابشي بشرغهم وبهني عليهم...والمال طال عمرك مب خساره يوم انته بتفرح به اهلك وعيالك ..خلهم يفرحون دامنا عايشين الله لايقصر عليهم ابشي .

بو محمد: تمام عيل على هواك الي تشوفه مناسب سوه.
قام بو خليفه وترخص من اخوه مويه صوب بيته وعياله...
نش بو محمد ودخل البيت وفي الصاله شاف الحرمه وعياله يالسين يطالعون التلفزيون
يلس عدال حصه ولوا عليهاا وحبها على خدها و راسها وتم ظامنها عداله... حس ان بنته بتفارجه وهوه مايحب حد في الدنيا ويغلى حد كثر حصه .. كلهم تمو يطالعون حصه وابوها ..
قالت ام حصه: شو هالوله اليوم على حصه غير عن العاده ههههه
بو محمد: وانا منو اغلى من حصه عندي في هالدنيا دومها حصه فديت روحها ماخذه الغلا كله ههههههه
بدت الغيره في عيون اخوان حصه قالت مريم : افا يابويه ماهقيتها منك يوم انا العوده والبجر ما ينولني شي من هالغلا ههههههههه
بو محمد: عنبوج انتي... اسكتي محد كثرج تبزا علينا ماخليتي شي من البزا حق خوانج ههههه
ناصر:لا انا احتج.. هيه العوده وبزيتها وهاي عاد دلوعتك حصه بعد ماقلنا شي ...وانحن شو مالنا رب ؟؟ههههههههه
قامت ام حصه وسارت لوت على ناصر وحبته وقالت: فديت روحك انا.. انته دلوعي انا ..كله ولا نصوري انته ماعليك منهم الي تباه من دلع بتحصله عندي ههههههه
بو محمد: راح الولد خربته هههههههههههههه شدي عليه خليه يستوي ريال لاتدلعينه الدلع للبنات والريال ماله الا الشده تربيه
ام محمد: يعلي انشالله اشوفهم رياييل واشوف اعيال اعيالهم يارب
مريم: ها حصه اشوف اليلسه عابتنج اهناك ههههههههههه قومي بسج دوري
قامت حصه لوت على ابوها وقالت :حرام عليكم ابو ويدلع بنته انتو شو حارنكم.. فيكم حسد يعني.. انا قررت اني مااخوز عنه.. واليوم بيرقد عندي بعد غياض فيكم ههههههههههههه
ام حصه: إإإيه... ابوكن مريض ماعن ثره عليكن خوزن عنه
ضحكو كلهم على ام حصه وقال بو محمد: خليهن فديت روحهن ...انا بخير منو قالج اني مريض ولاتفاولين عليه يالعيوز.
حصه :هههههههههه امايا اشوف الغيره عدوا وانتقلت لج ... وبعدين لا تفاولين على باباتي فديته خليه يبزينا .
ام حصه: شباه اغار عليه شيبه الحين راحت عليه هههههههه
بو محمد: هههههههههه غربلاتج يالعيوز بتودريني يعني الحين ..؟!!
ام محمد: شو عيل تباني اغار عليك وانحن في هالسن....تبانا ناخذ زمنا وزمن غيرنا... انا يابوك الغيره مخليتنها حق مريم وعبيد تغار عليه ويغار عليها.
مريم: فديت انا بو سالم الله يرده بالسلامه انشالله لاتطرونه اليه الحين ..بروحي متولهه عليه
(مريم متزوجه ولد عمتها ..وحامل في السابع ويتريون ولي العهد سالم)
ام محمد: استحي عاد بعدج لو تارسه البيت اعيال ... ما تتفدينه جدام حد ..منقود
مريم: هههههههه ريلي ياويلي مب حرام عليه.
حصه : امايا خلاص الزمن تغير.. عيل شقى الريال بيستقر وبيرتاح لازم الحرمه تظهر له غلاته وتدلعه وتتفداه جدام اهلها وهله بعد هههههههههه.
ام محمد: ههههههه اسميكن مب هينات ...بنات اليوم ما يغترهن شي..علومكن هاي مب زينه لاتتسمعن لربيعاتكن ..سيرن على رمستيه وتبعنهااا..
بو محمد: البنات يعرف شقى يحرسن رياييلهن لاتخربين عليهن انتي ههههههههه شورج مب نافع...
ضحكن البنات على رمست ابوهن وغمزله بالنصر
نشو العيال صوب حجرهم بيرقدون وفتح بو محمد موضوع عرس حصه بخليفه واستانست ام حصه للخبر وسارت بتخبر حصه
ام محمد: حصه بنتي.. شو رايج بولد عمج خليفه؟
حصه فهمت الموضوع وماعرفت شو تقول لأمها تمت ساكته
ام محمد: بو خليفه رمس ابوج اليوم وبيحددون العرس قريب انشالله ..وبيتج وبيت خليفه زاهب وعدالنا مابتسيرين ابعيد عنا ويبونج تختارين ديكوراته وتعدلينه على ذوقج
حصه: اماه هالكلام بدري عليه انا بعدني ماخلصت الثانويه ونتو استعيلتو..
ام محمد: العرس مابيستوي لين ماااتخلصين انتي وماباقي شي شهرين وبيخطفن.. وما نبى منج شي الحين اهتمي بدراستج... بس بعد من تخلصين خذي وقتج ورتبي حاياتج كلها ومابيستوي شي الا بشورج.
حصه: على خير انشالله
نشت ام محمد عن حصه وراحت حجرتها بترقد

تمت حصه طايحه تفكر في سالفة العرس ..حست ابظيقه اشوي ..ويمكن حطت في خاطرها ليش هيه ماالها شور في عرسها.. ليش امها ما سئلتها اذا هيه تبى خليفه ولد عمها والا لا...؟؟وليش اهلها ما معبرين رايها ولامسويلها سالفه..!!
بس ردت وقالت ..اهليه يبولي الخير والي فيه مصلحتي وانا مابضوي حد احسن من خليفه ولد عمي .
برغم ان حصه كانت في داخلها تحب خليفه ولد عمها وعاجبنها بس بعد هالشي ماظهر لاي حد .. وخليفه نفسه ماكان حاط في خاطره حصه لانها اصغر عنه بوايد ..
نامت حصه وصورة خليفه في بالها مافارقتها بعد ماتعبت من التفكيرفي موضوع العرس الي اهلها فاجؤوها به.

بالباجر انتشر الخبر بين الاهل والكل فرحان بالسالفه وام خليفه تتصل بام محمد اختها وتسمع رايهم وشو بيسوون وتتخبر عن اخبار حصه وعلومها عن العرس والفرحه مب سايعتنهم

في بيت بو خليفه كانو مجتمعين على الغدا والكل يرمس بسالفة حصه وخليفه
بو خليفه: خليفه نباك اتبيض الويه.. حصه خلها في عيونك هذي بنت عمك انا مابوصيك عليها.
خليفه: لاتوصيني على بنت عمي يالوالد .. حصه بحطها على راسي وفي عيوني مايهمكم.. بس يالوالد ماتشوف عمرك استعيلت بالعرس اشوي ..البنت بعدها صغيره وانا مب مستعيل خلوها تكمل دراستها عقب يصير خير ...
بو خليفه: ليش استعيلنا ..!!؟ ام كم تباها البنت .. ام ثلاثين والا اربيعين لين تاخذها..!! البنت حرمه ومب قاصرنها شي ولو تبى الدراسه بتكمل في بيت ريلها محد بيردها.
خليفه : بس يابويا..
بو خليفه : لا بس ولا شي بنت عمك مب ياهل البنت حرمه وساده البيت.
ام خليفه: خليفه ابويه ...بنت عمك حرمه وعقلها ماشالله .. افهم عن بناتنا كلهن بس جان شي في خاطرك غير ارمسبه .. محد بيغصبك على شي ماتباه
بو خليفه: ها خليفه شو في خاطرك على بنت عمك؟
خليفه : الوالد .. الوالده .. حرام اني اخير عن حصه مابضوي وحصه غاليه من غلات روضه وظبيه عندي وابالها الخير ... بس انا من رايي لو ان خالد ياخذ حصه احسن... من سنه وتناسبه اكثر مني..
بو خليفه: خليفه .. انا رمست عمك وخلصنا الموضوع عليك انته مب على خالد .. والعرس عقب ماتخلص حصه انشالله وغير هالرمسه ماعندي .. شوف عمرك وتشاور.. ولو هالشي مب عدل مابغصب حد عليه ..بس خساره تفرطون بنت عمكم من ايديكم وانا في خاطريه انك انته تاخذ حصه ..حصه مب ياهل يسدن تراحيبها ومايوبها عند العرب يوم بتلفيهم .

خليفه: الوالد كل شي بالضراابه الا العرس تراه بالاتفاق ..والهداوه.. والتشاور..انا حصه بنت عمي بس انا ماشوفها تناسبني ولا انا اناسبها...!!!
بو خليفه: ابويه انا ابوك واعرف الي يناسبك ولو بنت عمك ولو منو تكون من البنات مابيوزها ولديه الا اذا هيه تستاهله... تعوذ من ابليس ...وخل الشور عندي.
خليفه يأس من ابوه : سو الي يناسبك الوالد انا مالي شور .

قام بو خليفه وسار صوب حجرته .. كان الجو متكهرب اشوي في بيت بو خليفه ماحد توقع ردة فعل خليفه تكون جيه.. خليفه ماكان في خاطره العرس بس ماعنده سبب للرفض ..حصه بنت الكل يتمناها جمال واصل واخلاق وبنت عمه بس المشكله انه يشوفها صغيره وايد عليه وما يعرف كيف بيتفاهم مع ياهل وبتكون حرمته وها الشي كان مخوفنه

المسا .. قامت روضه واتصلت ببنت عمها حصه ..
حصه: روضه ماتشوفين اهلنا استعيلو في الموضوع اشويه.. انا احس ان في شي غلط بس مب عارفه شو هوه.
روضه: انتي يتهيئلج هالشي لان السالفه توها يديده عليج... بس في ذمتج حصه مب فراحنه لانج بتاخذين خليفه اخويه؟
حصه: بصراحه روضوه... انا من زمان خليفه يعجبني ..وايد احسبه غير دخلته علينا وهيبته ..بس ماكنت ادري اني باخذه ..كنت اشوفه عادي مثل اخويه محمد .
روضه: انزين انتي بصراحه تحبينه ؟
حصه: روضه شو هالمصاخه..!!
روضه : عادي مافيها شي ..
حصه : اوكي انا احبه... بس عقب العرس الحين مااعرف كيف احبه وايد مرتبكه من كل شي ... واحس اني لو اشوفه اني بشرد مابجابله هههههههههه.
روضه: هههههههه غربلاتك تطورت العزبه .. ماحيدج تتشردين عن حد.. قبل مطيحه الميانه ويا عيال عمج الحين بنستحي .... اااه يامكر البنات هههههههههه
حصه: مادري روضه احس.. احس بشي غريب بيستوي لي احس برعشه وخوف بس في داخليه شي يقولي اني احب خليفه ومادري احس اني مستانسه واحبه ومرات خايفه ومتردده .
روضه: هههههههههههههه يعني انتي تحبينه يالدبه .. ليش ماتقولينها ليش تيودين هالشي عنااا ..
حصه: روضه انا كنت معجبه بخوج... بس بصراحه .. شكلي من دريت اني باخذه بديت احبه ههههههههههه
سكرت حصه عن روضه ونشت حجرتها .. كان خليفه ماخذ كل تفكيرها ..ماتنلام كان ولد عمها وحبيبها الي بدت تفكر فيه كحبيب وبيكون ريلها عن قريب انشالله
عقب ماكان مثل اخوها ...
بس حصه ماكانت تعرف شو شعور خليفه ناحيتها ...والمصيبه خوف خليفه من انه ياخذ حصه الي يشوفها ياهل ... خل الكل يحس بالزعل على حصه ..معقوله حصه تحب خليفه عقب ماخطبها وصارت تفكر فيه كريل وهوه يحاول يتهرب من هالعرس بأي طريقه ..شو بيكون مصير حصه مع خليفه ..

مرت الايام وحصه مشغوله في دراستها وبنات عمها وياها كل يوم يدرسن وعقب ييلسن يسولفن عن عرس حصه وخليفه وماعند العايله الا سالفه العرس ... بس محد كان يعرف شو في نفس خليفه ... خليفه كان مب راضي عن العرس ولا يباااه ..بس ماقدر يسوي شي .. ومافي ايده شي يسويه ... فضل انه يسكت ويخلي العايله تفرح وتستانس ... وخاصه عقب مادرت حصه بالعرس ومارفضت ومااعترضت ماقدر انه يضايقها والا يجرح شعورها ..
كان خليفه ما ييلس في البيت دايمن يطلع .. ويتجنب انه يلاقي حصه في بيتهم والا في بيت عمه ... ماكان يكثر الزيارات عليهم وحته عمه كان دايما يتخبر عنه ... بس الكل كان يقوله ان خليفه مشغول في العرس ويرابع شرق غرب عسب الترتيبات والمشتريات والحجوزات .. ماكان حد يدري انه خليفه كان شال ايده من موضوع العرس نهاائي وانه رفض انه يسوي شي في عرسه ..
ماكان الوضع عاجب ابو خليفه وامه ..خليفه مب من عادته انه يتصرف جيه ..كان ريال البيت ومايعز شي على هله وهو الامر الناهي عقب ابوه ...وحته امه وخواته كان مسؤول عنهن مسؤوليه كامله .. خليفه انسان طيب وبيتوتي ويحب اهله وايد ..بس ماكان يحب ان ينغصب على شي .. كان حاط في خاطره كيف انه عقب الي يسويه لهله وطيبته ومعناه عندهم يجازونه جذيه ولا يسووله راىي والا حته كلمه في عرسه ...

مر شهر على هذي السالفه وقربن الامتحانات .... كان يوم الجمعه وحصه وامها وخوانها يالسين في الصاله يتريون ابوهم يظهر بيدخنون وبيسيرون المسيد ..ومثل كل جمعه كانو عيال عم حصه ايوون يسلمون على خالتهم وعمهم قبل مايسيرون الصلاه ... دخل خليفه واول مادخل طاحت اعيونه على حصه ..كانت يالسه تدخن ابوها وماانتبهت لخليفه يوم حدر .. حس خليفه بتأنيب الضمير ناحية حصه .. ليش هوه قاسي عليها .. ليش مب قادر يتقبلها حرمه له .. نزل عينه عنها ودخل وسلم .. نشو كلهم يسلمون على خليفه ويوايهونه .. سلم خليفه على عمه وخالته والتفت صوب حصه يسلم عليها .
خليفه: كيف حالج حصه .. عساج ابخير..؟!!
حصه : الحمدلله بخير ... شحالك انت..؟
تغير ويه حصه من شافت خليفه ... يتها رعشه وارتباك .. استحت منه ... كانت هاي اول مره تشوف فيها خليفه من عقب مارمسو في موضوعهم..نزلت اعيونها عنه ماكانت تقدر تحط عينها في عينه... هذا بيكون ريلها ... كيف ..؟؟ لين اليوم حصه ماتعرف شعور خليفه ناحيتها .. يحبها..؟؟ والا مايحبها..؟؟ هوه الي قال انه يباها والا كان اختيار اهله..!! حصه كان في راسها تساؤلات وايد عن خليفه ..بس محد كان يقدر يجاوبها عليهن..
يلسو كلهم وقال بو حصه لحصه : نشي حصه .. قهويي ولد عمج وعقب وديه المدخن.
خليفه: تسلم عمي ..انا توني متقهوي ومدخن وخالص في البيت .. لاتتعب حصه خلها مرتاحه ..
ام حصه : لا تعب ولا شي ..قومي حصه هاتي عصير لبو عجيل.
نشت حصه وسارت المطبخ التحضيري ..جهزت الخدامه العصير ويابته لحصه علشان توديه..حصه كانت في عالم ثاني ... خليفه كان وايد مأثر عليها..زقرتها الخدامه وعقب انتبهت حصه لعمرها وشلت العصير وسارت به الصاله .. جدمته لولد عمها ..
حصه: تفضل...
خليفه : سلمتي الغاليه
سارت حصه ويلست عدال ابوها .. خليفه لين الحين مانتبه لحصه ولا ناظرها ولا ابتسم الها ..معاملته الها طبيعيه مافيها اي مشاعر..حصه كانت تتريا ولو نظره من خليفه شي يحسسها ان هالانسان يودها .. يكنلها شي من الحب .. وان ما بينه الحين كان بيظهره الها بعد العرس
بس ما لاحظت عليه اي شي ..
يا وقت الصلاه وطلعو الرياييل للصلاه في المسيد.. تمت حصه واقفه تطالع الباب الي ظهر منه خليفه .. خليفه ماكلمها من يلس ولا كان يبتسم الها ..!! حست حصه بظيق .. سألت امها..
حصه: اماه يوم خذتي ابويا كنتو تحبون بعض والا ماكان يعرفج وماكنتي تعرفينه؟
ام حصه: انحن على ايامنا الحب موجود والناس تتحاب وتتواخذ ..بس انا وابوج رابين رباعه وييران..ويوم خطبني انا صغيره مااعرف الحب ..وعقب تحابينا
حصه شي في خاطرج..؟؟ ليش هالسوأل..؟؟
حصه:لا اماه بس اتخبر..
ام حصه: حصه بنتي خليفه ولد عمج يودج ويباج ولا ما كان بيتجدم لج.. انحن ولو نباكم البعض بس محد بيغصبكم ..وهوه بكيفه يباج واظن انه من زمان متخيرنج ويترياج.

استانست حصه على كلام امها وريحها اشوي.. قامت ودخلت بتصلي وتدعى ان الله يوفقها مع خليفه ويوفق خليفه في حياته .

بعد اسبوع بدت اجازة حصه وروضه وظبيه .. هالشهر بيتمن يذاكرن في البيت ويستعدن للامتحانات .. كانت حصه تسير بيت عمها وييلسن في حجرة روضه يذاكرن.. ومرات كانن ييلسن في الصاله..
حصه: ظبيه اسئليني وانا بجاوب احس اني انسى ابسرعه الي احفظه.
روضه: لازم تنسين حبيبتي .. ههههههههه بالج مشغول في شي ثاني .. مب في الدراسه
ظبيه: ماتنلام خليفه ماخلى فيها عقل تذاكر ..تبات تحلم به وتصبح تفكر فيه ..والدراسه ودرتها النا ههههههه
حصه: مالت عليكن انا اصلا ماافكر في العرس وناااسيه السالفه مول وخليفه بعد ماافكر فيه.. وليش اصلا افكر فيه يوم هوه مافكر فيه ولا اهتم
وسوت عمرها زعلانه ... روضه وظبيه ارتبكن من رمست حصه.. مع ان حصه كانت تسولف ومب قاصده الي قالته ..وعقب البنات سون عمارهن يضحكن ..
ظبيه: اسميج انج !!.. استحي عنبوج شو تبين الريال لاصق في بيتكم مايخوز ليش ماشي مستحى ههههه
روضه: هيه والله والا تبينه يدقدق لج تيلفونات ويتغزل فيج ههههههههه ..ها الي تبينه؟؟
استحت حصه ..
حصه: لا عاد مب جيه ياغبيات .. افهمن .. الخطيب لازم يسيير على خطيبته يحسسها برغبته فيها .. يقولها انه يباها .. لعنبوه شقا وانحن عيال عم .. وحته الشوف مااشوفه..!!
روضه: غربلاتج جنه خليفه حاشرنا عليج ويباج اليوم قبل باجر .. بس انتي الي مأخره السالفه بإمتحاناتج .. وهوه مب شرط انه يقولج انه يباج تراج بتستوين حرمته وباجر بتسمعين منه هالرمسه لين تملين .
ظبيه: لاتستعيلين على رزقج ..
حصه: لا انا عادي ..بس عاد لاتطرن العرس طلعتنا من المذاكره وخربتن تفكيري
روضه : ههههههههههههههههه آآه منج شفتي ان خليفه مخبلنج وماخذ تفكيرج عن المذاكره

في هاللحضه دخل خليفه عليهم في الصاله.. نشن كلهن يسلمن عليه..
روضه: حيالله المعرس ... تعال عروسك حشرتنا عليك.. كله اتخبر عنك ههههههههه
استحت حصه واحمر ويها وتمت تدعي على روضه في خاطرها
خليفه: تخبرت عليها العافيه ..علومج حصه ..وعلوم الدراسه؟
حصه: الحمدلله كل شي اوكي.. ماعليك من رمستها هالحياله ...تراها تدور سالفه بس تتسلابها ههههههههه
ظبيه: انزين عاد ولو تخبرتي عنه ترا ولد عمج مافيها شي هههههههه
قالتها ظبيه بخبث .. احرجت حصه وتم خليفه ساكت
روضه:خليفه تعال اسأل حصه تبى حد يذاكر إلها ..
خليفه : حاضرين ... شو ياحصه شو تبيني اسألج فيه؟
حصه: لا خليفه انا ماابى شي مشكور انا مذاكره ومخلصه
خليفه: افا ياحصه مب اول مره اسألج وتدرسين ويايه .. هاتي كتابج الغاليه خلي عنج المستحى .. انا مااعرفج تستحين ههههههههه
حصه وهيه مستانسه في داخلها .. وشعور تملكها ناحية خليفه خلاها ماتعرف ترمس ولا تقول شي
قامت وشلت اكتابها وسارت صوب خليفه يلست حذاله ومسك هوه لكتاب وتم يقرا الاسئله
حصه تمت تطالع خليفه وهيه مب حاسه بعمرها .. تملكها شعور ناحيته ..حصه تحبه ..لا وبعد تعشقه.. خليفه سيطر على قلب حصه ومشاعرها من دون مايسوي هوه اي شي ولا حته يدري..
تمت تطالعه تشوف اعيونه خشمه لحيته شفايفه .. ويدينه وهيه ماسكه لكتاب وشعره وكل شي فيه .. قالت في خاطرها ياويلي كم احبه ... هذا حبيبي .. ولد عمي .. وريلي انشالله.. محد كان يعرف شعور حصه ناحية ولد عمها ..كان شعور يديد تملكها بس من حست ان هالانسان بيصير ريلها وبيكون حلال عليها انها تحبه ...مانتبهت لاي شي... من زمان ما يلست ويا خليفه وناظرته عن جريب .. كانت مستحيه منه .. بس خليفه كان عادي ولا افتكر بالي كان يستوي لحصه وهيه حذاله ...
طلعن روضه وظبيه بدون ما يحسوبهن .. وفي خاطرهن يبن يخلن الجو لحصه وخليفه .. يقولن انشالله ان خليفه يحس بحصه ويهتم ابها والا انشالله يبدا يحس ابحب صوبها.. كانن يبنه يفكر ابها كزوجه مش كأخت..راحن وتمن يترين خاري عند الباب مايبن يخربن عليهم ..
روضه: تتوقعين شي يصير .. خليفه بيغير رايه ناحية حصه
ظبيه: مادري.. بس حصه شكلها تحب خليفه اكيد بتقدر تغيره اذا مب الحين بعد العرس .. ومنو مايقدر يحب حصه.. حصه تنحب وتروح فيها ارقاب بعد
روضه : انشالله يارب وايد احب حصه وابى خليفه ياخذها
ظبيه: بس سكتي اخاف حصه تظهر وتسمع

في الصاله كان خليفه يسأل حصه مرات بكل جديه.. ومرات كان يمازحها ويضحك عليها .. وهيه اندمجت وياه وارتاحت اعصابها وخذت راحتها في الرمسه وياه..
خليفه: تقولين انج مذاكره ومخلصه ... هااه ليش ماتجاوبين صح ؟؟ ههههههههه
حصه: لا انا اعرف بس انته تخوفني .. لاتسألني جيه كأنك بتاكلني شوي شوي عليه ههههه
خليفه: شو ها الدلع بعد .. اصطلبي ماشي دلع في الدراسه ههههههههههه
حصه: خلاص خلاص اسأل من الاول
خليفه :شو ...!!! اشوف السالفه عيبتج ههههههه تبيني اسألج بعدني ..على هواج بنت راشد ... تزهبي عيل الحين الغلطه بضربه.
حصه: لالا شو ضربه بعد ههههههههه هات اكتابي ماباك تسألني..
خليفه: الحمدلله هههههههه دوج اكتابج فكيتيني هههههههه
حصه : هيه جكيتك .. الحين هذا الي انته تباه هههههههههه ماعليه بخبر ابويه هههههههه
خليفه: لا يوم السالفه فيها ابوج ..عيل هاتي كتابج وانثبري مكانج هههههههههه
حصه: حشه حشه لاتسألني مابى يوم السالفه فيها ضرب انا انسحب من خاطريه ههههههههه

في هاللحضه دخلت ام خليفه عليهم.. جان تضحك من خاطرها يوم شافتهم ارباعه ..قالت في خاطرها ..فديتهم انا... الله يهدي خليفه وتعرف حصه كيف تلين قلبه وتخليه يقتنع بالعرس
نش خليفه وسار صوب امه وحبها على راسها ويابها عدالهم تيلس
ام خليفه: ها حصه منو بيضرب منوه هههههههه
حصه: هذا ولدج خالوه ناوي يضربني يقول ان الحريم مايمشن الا بالضرب ههههههههه
ام خليفه زاغت :خليفه عنبوك ...بتضرب البنت ناوي
تم خليفه يضحك على امه
خليفه: لا امايا مب انا الي قلت ...ها بنت اختج ناويه تضربني متوحشه ظهرت ههههههه
حصه: بسم الله عليه .. ياربي مجذب ولدج خالوه.. انا بشرد عنه من شوي كان يبى يضربني والحين يقول اني متوحشه... بعد اشويه بيقول اني ساحره ..لالا انا سايره بيتنا مااتحمل هالمعامله ههههههههه
ام خليفه: اسميك طفرت البنت .. شو يلسك عندها انته .. قبل نباك تيلس الحين مول لاتجابلها فكها منك ههههههه
خليفه: اسميكن حريم وتعاونتن عليه اكيد بتظهرني غلطان ... مبروك عليج البراأة بنت خالوه ههههههههه انا بنش عنكن
دخلن روضه وظبيه وستانسن يوم شافنهم مستانسين
خليفه: توكن ييتن وين خليتني ويا هالوحوش حشه كلني هههههههههه
روضه :منو وحوش ها امك وحرمتك محد بياكلك الا جان بيتضاربن عليك وبيطفرنك من زود مايغارن عليك ههههههههههه
خليفه برتباك : احم بنات وين سفرتيه ..؟؟
ضحكن البنات عليه
روضه:هكيه اهناك على الكرسي..حصه هاتي السفره حق ريلج هههههههه انحن مالنا خص الحين به وانتي موجوده ..
حصه: بيب له السفره بس مب لانه بيستوي ريلي ... بس علشان يفكني منه ويسير هههههههههه
خليفه: بعدي من حرمتيه..والله فيج فايده ... وغياض يوم انج تبين الفكه اننا بنعرس بسرعه هههههههه
حصه: هيه يتحراني خدامه ... بس جدام العرس اسوي جيه هههههههه هذا كله الا الحينه عقب العرس غير ..
خليفه: هيه جيه السالفه زين يوم خبرتي على عمرج ههههههه امايا انا غيرت رايي ماباها .
ام خليفه: حافظ عليكم انتو من زمان بعيد ماحد رمس الثاني شو الي لمكم اليوم .. بتخربون علينا السالفه ههههههههه
خليفه: الله يستر يامايا الحرمه طلعت مب هينه هههههههههه
حصه: لا خالوه انا خلاص غيرت رايي بعد مابى ولدكم هههههههه
ام خليفه: انتو من صدقكم الحين ترمسون ؟؟؟
تمو ساكتين .. خليفه في خاطره يقول ... تدرين يامايا شو الي اباه بس ماشي فايده
وحصه سكتت ماعرفت شو بالضبط في خاطرها.. اليوم كانت وايد مستانسه ويا خليفه بس بعدها ماعرفت شو الي في خاطره ناحيتها ... كانت سوالف عاديه ومابين الها شي يأشر ان خليفه يحبها مثل ماهيه تحبه.. وسكوووت خليفه خلاها تترياه يرمس ...تقول يمكن يقول شي يريحها ... بس خليفه حط عينه بعين حصه وتمو يطالعون بعض ..وكل واحد يفكر ..خليفه يقول في خاطره..اخاف اظلمها ويايه وماتهون عليه اعذبها انا مااقدر احبها كزوجه هاي مثل اختي...
وحصه تقول في خاطرها..ليش ياخليفه ماتريحني ليش ماتقول اذا انته تحبني وتباني والا لا ..!!نفسي اسمعا منك وارتاح..

الجزء الثاني

روح انا راضي بحظي والمـقدر ..... كل واحد في حياته له نصيب
عزتي ترفض على الظلم اتصبر .... من يبيع الحب مايصلح حبيب

انتبه خليفه لعمره وقام عن هله وسار ... وقفت حصه وترخصت من خالتها وسارت... قامن روضه وظبيه بيوصلن بنت عمهن .. بس حصه ماطاعت وقالت الهن يردن.. انقبض قلبها مره وحده وحست ابضيق وكانت تبى تكون بروحها ..خاطرها تصيح .. خاطرها تصرخ اتقول ..شو الي يصير ... كانت ضايعه مب عارفه شو تسوي...

كانت تمشى في حديقة بيتهم ماتعرف شو تسوي وماتبى تدخل بيتهم ماتبى تشوف حد والا حد يرمسها...شافت ليتات سياره داخله بيتهم ..ووقفت في قراجاتهم ...وان اخوها محمد نازل من السياره وشافها واقفه ... قفل سيارته وسار صوبها.. شافته فبتسم الهاااا وابتسمت له... ياها وحبها على راسها ومسك ايدها وتم يمشي وياها..
محمد: علومها لغزيل ..!!؟؟ شو تسوي في هالليل اتمشى خاري ..؟
حصه: ماشي فديتك... بس ضايقه وبغيت اتمشى في الحوش اشوي.
محمد : عسى ماشر الغلى... حد مضايقنج؟
حصه: لا فديت روحك ...بس هاي حاله يت بروحا وبتسير ابروحها..
محمد : حصه اذا فيج اي شي خبريني ..انا اخوج ..
حصه : مافي شي يستاهل فديت روحك.. بس تقدر تقول قلق من الامتحانات..!!
محمد: اها.. زين عيل ..تعالي حدرنا
حصه: يالله حدرنا
محمد: تسابقين ..؟؟ هههههههههه
حصه : ههههههههه اسابق
دز محمد اخته حصه على ورا وربع عنها صوب البيت ..انقهرت حصه كيف محمد قص عليها وخدعها ماطاعت تربع وراحت تمشي للبيت ومن وصلت شافت محمد واقف يضحك عليها...
محمد: انتي دبه ماترومين تسابقين ههههههههههه
حصه وبقهر : هيه دبه دبه ... مادري منو ها الي دزني وربع عني ...انا بروحي لو تفجني قبلك بكيلو بعدك بتغلبني ... والله انته شرير
محمد: كنت اسويلج لياقه قبل العرس بس طلع مافيج فايده ماتسرين هههههههه
حصه: ليش شو قالولك بيركظني الريل ..شو انا ناقه هههههههه
محمد : هههههههههههههه حي الناقه تنباع وترد بيزات ... الا انتن الا خسااره من ياخذكن الريل لين يطلقكن هههههههه
حصه: فال الله ولا فالك
محمد: هههههههههههههههه
سار محمد وحصه وطلعو فوق عند حجرهم وقبل مايدخل محمد حجرته التفت صوب حصه وزقرها
محمد: حصه
حصه: لبيه..
محمد: حظ خليفه بج .. والله انه حظيظ
استحت حصه من كلام اخوها وسكتت
محمد: حصه
حصه: لبيه الغالي
محمد: تصبحين على خير

وعت حصه الصبح وكان قلبها يدق ابسرعه باقي عن طلوع النتائج يوم واحد والكل كان يطلع نتايجه من الكنترول ... محمد اخو حصه قايل لحصه ان البشاره له ...قامت حصه بتوعي محمد تباه يوفي بوعده ويظهر نتايجهن هيه وبنات عمهاااا بس محمد ماطاع ينش عاطنها بو لابس ...نزلت تحت ولقت امها وابوها... صبحت عليهم وحبتهم على روسهم ويلست ...
ابو محمد: حصه شو النتايج؟؟
حصه: والله ياابويا محمد قالي بيظهرهن بس هوه راقد مب طايع ينش
بو محمد: اتصلي ببنات عمج شوفيهن
حصه : كلمتهن الوالد بس ماعندهن خبر....انا برمسهن مره ثانيه بخليهن ايين ييلسن عندي مب قادره امسك اعصابي والله تعب ...
ام حصه: عنبووه شو ها ذلو العرب هم شعنه مايخبرونهن من خلصن امتحاناتهن عزروبهن لين الحينه .. فديتا حصه والله ذوت من الامتحانات وعقب ينها النتايج غربلنها .
بو محمد: ثرها الا بنتج وبنات اختج يمتحنن..؟؟ الدوله كلها امتحنت ولجنه تصحح ولجنه تراجع ولاتستعيلن.. الي مسوي زين بيلقاها النتيجه الزينه والي يحيد عمره الله هنه تراها بيلقاها بعد

رن تلفون البيت .. فزت حصه.. قالها ابوها ردي عسى خير
نشت حصه بترد على التيلفون
حصه : الوو
خليفه: هلا بالحص .. شو بتعطيني بشاره ههههههه؟؟
حصه وهي متحفزه : الي تبااااااااه امره الي في خاطرك ...ها بشر........؟؟!!
خليفه: الي اباه ...؟؟
حصه : هيه هيه مره مره الي تباه .. قول عاد لاتحرق اعصابي؟؟
خليفه : اخاف الي اباه صعب عليج .. وماتعطيني اياه..؟؟
حصه وهي منقهره :خليفه يالله عاد والله مذله
خليفه وهو يغايضها اكثر : انزين قولي مستانسه؟؟
حصه وهي متملله من خليفه: اذا البشاره اوكي اكيد بستاااانس يالله عاد قول.. ؟؟
خليفه : بقرة امايه ولدت يابت إعييله ..
حصه : .....................@@....
خليفه : الو
حست حصه انها تبى اتصيح وتضحك مب عارفه شقى تستحمل برودتهم
خليفه : ههههههههههههههههههههههههههههه مبروك يالمصريه نجحتي بنسبة 91

حصه: لا ماصدق تجذب عليه...!!
خليفه: والله
حصه : انزين صبر ..
حصه: ابويا تعال شوف ولد اخوك يتمصخر عليه من الصبح
بو محمد : انا مالي خص ولد عمج وتفاهمي وياه ههههههه
حصه : خليفه قول والله ..؟؟
خليفه : صدقي يابنت الحلال والله اقولج.... بس عاد لاتنسين البشاره ..
حصه : ههههههههههههه مايهمك بس روضه وظبيه كم يابن ؟
خليفه :روضه 85 وظبيه 91
سكرت حصه عن خليفه وسارت تبشر اهلها ..الاهل مستانسين على نتايج البنااااات وسار ابو حصه وامها وحصه صوب بيت عم حصه يباركولهم على النتايج ..وفي بيت بو خليفه كان الجميع متيمعين يسولفون ويتغايظون .

بو خليفه:الحين طاحت عنكن ..على شوه ناويات انشالله ..؟
روضه : انا الجامعه سيده ماشي منا ولا مناك ههههههههه
ظبيه: لا انا افكر اسافر الخارج اكمل ..... شو رايك الوالد ؟؟
ظبيه تعرف شو بيكون رد فعل الوالد بس بغت تغايظه ...
بو خليفه : تشوفينها هالعصى ؟؟ تتحنى يومين وخلاف تنملييبها على يامعتج ههههههههههه يوم ها شورج تزهبي بنيوزج ريل يقبضج عن الهوامه .... وين تبين بعد الخارج ؟؟!!!
ظبيه : والله انتو ماتشجعونا .. ماشي مستوى دراسي اهنيه .
حصه:اييكم الله بشور؟....انحن بنسافر ارباعه انا وروضه وظبيه ومن نخلص دراسه بنرد ... ها شو رايكم هههه؟؟
بو خليفه : الراي انج انتي تزدهبين بنيوزج وجان تبين تدرسين ..هكن جامعاتنا وكلياتنا .. ها بو محمد شو رايك؟
استحت حصه وارتبكت... عمها مول مب عاطنهم مجال وشكله في خاطره بيزوجهم اليوم قبل باجر ...
بو محمد: طال عمرك ماشي راي عقب رايك .... والبنت عندكم لو تباها اليوم مابتظهر من بيتك.

مرن الايام وحصه واهلها كلهم يستعدون لعرس حصه وخليفه .... اول شي كان على حصه تختار ديكورات البيت والفرش والاثاث..... بعدين تبدا تشتري اغراضها وفستان العرس وباقي الترتيبات..
كانو مريحين حصه من كل النواحي ويساعدونها ..امها وخالتها وبنات عمها.. وكانت حصه تاخذ وايد وقت في بيتها اليديد ..واحيانا كانت تصادف خليفه اهناك ..يمر يخلص بعض الاشغال مال البيت والمهندس معاه.. كانت تاخذ رايه في وايد اشياء الالوااان والفرش والديكورات ... وخليفه كان مايقصر وياها ...بس كان كلامه وياها وايد قليل ..كان مرات يشوفها يبتسم ويروح .. حصه تقول يمكن انه مشغول ..والا مستحي ييلس وياها روحهم ...

تصادفت حصه ويا خليفه مره في البيت وامها وياهااا وكانن يحطن الاكسسوارات ويرتبن الامور الصغيره والبيت زهب من كل شي ...وطلع تحفه في الاناقه .. كلمن يشوفه كان يمدح ترتيبه والذوق الي فيه ..دخل خليفه البيت وكان ياييب الكهربائي علشان يسلك للتلفزيون والدش
خليفه: حصه تغشي ريال بيحدر
حصه : انشالله .. انحن خلصنا بنظهر
ام حصه : ابويا خليفه من يخلص هالرياال اباك في البيت
خليفه: تامرين خالوه ...مره من يسير.. بييكم.. حصه لو سمحتي اباج اتمين علشان انشوف كيف تبين القنوات.. ويايبه الوالده اغراض حطيهن على عينج
حصه : انشالله انحن بنسير داخل الحين ..لين تخلصون.. خبرنا ..
ام حصه : انا بسير عيل وبطرشلج الخدامه.. ابوج يا الحين ومحد عنده في البيت
حصه : زين اماااااه انا ما ببطي انشالله
سارت ام حصه وتم خليفه ويا الكهربائي يعدلون الدش وحصه حدرت داخل ترتب في الغرف
دخل عليها خليفه الحجره.. شافهاا قال في خاطره .. جمال وربي صور وكمل وحسن وطيب ومعاني في هالانسانه .. تستاهل واحد احسن مني يقدر يحبها ويرعاها .. بس كيف انا اقدر احبها ياربي .. يارب دخل حبها في قلبي ..ياربي خلني احس ابهاالانسانه واموت فيها ..ماابى اظلمها ويايه .
انتبهت حصه لخليفه .. وقفت تشوف كيف استوى حال خليفه تعب وتفكير وشكله شال هم الدنيا كله على راسه .. قالت في خاطرها فديت روحك يابعد كلي وهلي وناسي .. ما ودي اشوف اعيونك وحالك بهالصوره .. وين خليفه ايام قبل ايام الضحك والوناسه .. شو فيك يابعد روحي .. نفسي ادخل في داخلك واعرف هالعيون في شوه تفكر ..نفسي ادخل قلبك واكشف اسرارك ... بس لين الحين مااعرف اذا يحقلي هالشي والا لاااا..!!
تجدم خليفه من حصه ووقف قبالها وفي خاطره شي يقوله بس كان متردد.. بس اخر شي تشجع وقرر يطلع الي عنده..

خليفه: حصه انا بغيتج في كلمتين ..!!
حصه من شافت خليفه حست ان سكوت خليفه هالوقت كله .. بينفرج الحين ... بتعرف شو في هالانسان متغير ........
خليفه : حصه شو رايج في عرسنا ؟؟
حصه ماعرفت شو تقوله ....شو هالسوأل..!! الحين يسألها .؟؟ !! بعد ماجهزو كل شي .. الحين يسألها ..!! وينه من زمان .. وشو في خاطره ؟ ليش هالسوأ ل الحين ..!!
حصه وهي حايره ومب عارفه شو في خاطر ولد عمها وحبيبها ..

حصه: اعتقد ياخليفه لا انا ولا انته كان النا شور في هالعرس.. واهلنا اختارو النا ..والي اشوفه اننا عيال عم ومحد منا بيتخير على الثاني ..والا انا غلطانه ..؟
سكت خليفه .. مايبى يخرب كل شي سووه اهله والا انه يجرح بنت عمه ..
خليفه : حصه انا مب عارف كيف اقولج الشي الي في خاطريه ... ولو اقوله... تراه ماشي بيتغير ..بس ابى يكون عندج علم بالي حل بي والي بيصير النااا عقب العرس .
حصه : خليفه خوفتني ..!!
خليفه : اباج تسمعين كلامي زين وتفهمينه.. انا اباج تكونين اسعد وحده في هالدنيا .. حصه انتي قبل ما تكونين حرمتي كنتي اختي .. ربيت اوياج.. مايوم فكرت فيج كوحده غريبه ..والا انج تكونين ام لعيالي .. بس هالقدر وها النصيب .. اهلنا قررو عنا .. ودي اعرف انتي شو رايج مستانسه ؟؟ تبين تكملين باقي عمرج ويايه .. وتكونين ام لعيالي ؟؟
حصه بهدوء : يعني انته مااخترتني بنفسك زوجه لك وام لعيالك ..؟
خليفه : انتي تعرفين ان هذا قرار الوالد ومن زمااان .. وانا مالحقت اختار والا اقول شي ..

حصه اخيرا عرفت شو الي في خليفه .. حصه فهمت الحين بس خليفه ليش كان متغير ..ليش كان حزين .. ليش ماكان يرمسها والا ليش ماياها وقالها انه يباها ..وانه يحبها..!! ... حصه عرفت ان خليفه ماحبها في يوم كزوجه .. كان حبه الها كبنت عم واخت وبس ... يعني خليفه الحين يبى يفهمها انه مايقدر يتخيلها زوجه ... اااااه يالقدر .. ليش تلعب بي هاللعبه .. حصه ماقدرت توقف .. يلست على الشبريه ونزلت راسها تحت .. نزلت دمعتهاااا .. بس مابغت خليفه يشوفهااا ..ماهانت عليها نفسها تنذل .. مابغت تفضح مشاعرها ناحية خليفه ..
حصه : شو المطلوب مني الحين ..؟؟
خليفه : بنت عمي لاتفهميني غلط فديت روحج.. انا لو بختار من مليون بنت مابختار غيرج .. انا رضيت بج لانج انتي نصيبي .. بنت عمي .. تستر عليه وتشرفني بين العرب.

كل كلمه من خليفه كانت مثل الطعنه في قلب حصه .. كانت تشوف حبها الكبير ينهار جدامها ..شافت حبها لخليفه كيف تأسس من غير اساس .. على اي اساس حبيته !!..وهوه مابادلني هالحب ..ليش حبيته ؟؟ انا غلطانه ..ليش يااهلي جرحتوني..ليش يبتولي خليفه احبه ..وهو مغصوب عليه .. كيف رضيتو عليه هالشي!! . كيف انا كنت رخيصه عندكم .!!

حصه : خليفه انا من البدايه ماعارضت هلي.. وعمري مارديتلهم طلب ...من يوم انا صغيره كنت اشوفك اخو كبير لي كنت اشوفك مثل محمد اخويه.. بس من يوم مايتني امي وخبرتني عن رغبت عمي بزواجنا ..كل هذا تغير في لحضه .. صرت اشوفك الزوج والاخو والابو والحبيب.. خليفه انا الحين حاضره بالي تشوفه مناسب .. انا فهمت الحين ليش انته متغير ..ماالومك ياولد عمي ..صعب انك تزوج اخوااان .. منو يقدر يتخيلهااا .. بس المشكله اهلنا غلطو في حقنا ومانقدر نلومهم ..

حس خليفه ان هله والدنيا كلها واقفه ضده..الا بنت عمه الي كان رافظنها ..هيه الوحيده الي وقفت معاه وحست به وشاف عمره كيف انه صدق ظلم هالانسانه معاه....... حس انه صغير عدااالها.. كيف ان عقلها الكبير تفهم الموضوع ونفس الوقت تقبلته وتفهمت وسامحت..
ليتني عرفت قدرج يابنت عمي قبل ماارمس واجرحج..
مكتوب الحصه انها تعرف شعور خليفه ناحيتهاا ... بس كان وايد متأخر ..

قامت حصه وظهرت بتسير بيت ابوها .. كانت اريولها غصب اتشلهااا ..بس ماقدرت تظهر لخليفه انكسارها والمها ..نفسها عزيزه وشو مايكون الحب الي شلته في قلبها صوب خليفه ..عمرها مابيذلها هالحب ..بتم حصه عازه نفسها ..ورافعه قدرها ماينزل..
خليفه كان خاطره يمسك ايد بنت عمه ويوصلها ..شايف حالتها كيف بس خايف انها تصده وخايف انه يزيد من عذابها...
سارت حصه وتم خليفه في البيت ..سار يلس في الصاله وتم يفكر ... مجرد انه كلم بنت عمه حس انها شلت الحمل كله عنه ..خففت عليه ..رغم انه كان يشوفها صغيره وماتتحمل شي وانه مايقدر يتفاهم معاها ..بس اثبتت له انها غير ..اثبتت له انها انسانه واعيه وعاقله وتتحمل المسؤوليه ..
ماقدر خليفه يرد البيت ..ماقدر يواجه هله ..خاصه وان تصور ان حصه بترمس اهلها وتقولهم بالي صار والكلام الي دار امبينهم.. تصور ان حصه ممكن انها ترفض الزواج ويمكن العايله تنجلب كلها عليه..اذا عرفو السبب ..بس ماتوقع ان حصه بتعرضه لمشكله من هالنوع مع اهله .. توقع انها تنهي الموضوع بمعرفتها وبدون ماتخلي له يد في السالفه .. وفي نفس الوقت كان خايف عليهاااا .. وكان ضميره يأنبه
ماحس بنفسه ؟؟انقضى الليل وخليفه في البيت منسدح يفكر بحصه وبه وبالوقت الياي ..

اما حصه فمن دخلت بيتهم راحت حجرتهاا ومحد شافها من اهلهااا.. كانت منهاره ..حست بالظلم من اهلها ومن ولد عمها ..من اقرب الناس الها..شو الي اقدر اسويه الحين ..كيف خليفه شال ها الهم من زمان وماخبرني ..ليتك تكلمت من زمان ..ليتك تكلمت ..شو الي اقدر اسويه الحين ياولد عمي..وانا كيف اقدر امحي هالحب الي انولد فيه ناحيتك.. كيف ياقلبي ظلمتك ..من الي بتعشقه وبتحبه بعد خليفه ..؟؟خلاص ياقلبي العمر بعد خليفه بينتهى ..

كان يوم العرس
..حصه داخل عند الي بتعدلها للعرس ..وبنات عمها عندها.. كل شي جهز في وقته ..والاهل مشغولين ويا المعازيم ..وخليفه كان في العرس يامر وينهى ويرتب ويستقبل الضيوف والمعازيم مثل الاله ..
حصه كانت في حاله ماتنحسد عليها..ماقدرت تتصرف وتنهى موضوع العرس... ولا خليفه قدر يرمس .. مشاا كل شي مثل ماخططوله الاهل ..كان خليفه يشوف فرحة ابوه وخوانه وامه .. يقول في نفسه ..الله لايغير عليهم فرحتهم .. ويالله يارب توفقني ويا حصه وتكون نست الي صار امبيناااا ..

حصه من بعد الي صار تغيرت وااايد.. ماتمت حصه الي الكل يعرفهااا.. تبدلت لوحده هاديه ساكته ماتناقش ماالها راي... اعيونها كانت الدمعه ماتفارقهن.. الكل كان يقول هاي حالة كل عروس ..وانها حزينه لانها بتفارج ابوها و امها و اخوانهاا..
بس حصه كانت تقول في نفسها ..انا مشيت اوياكم على الي تبونه... بس لاتلوموني اذا الزمن عاند ويايه وما طاوعني على الي طاوعتكم عليه...

زفو العروس والمعرس ... كانو مناسبين البعض وايد .. عيون الحسد كانت تناظرهم من كل صوب ... والاهل شالينهم من الارض شل ..وفرحتهم عمت كل المدينه
بس لا حصه كانت تقدر تحط عينها في عين خليفه ولا خليفه كان يقدر يبدا بأي شي مع حصه ...!!!
انتهى العرس وشل المعرس عروسه على بيتهم ... وبالباجر كانو بيسافرون فرنسا شهر العسل ...
ليلة الدخله...
خليفه وعروسه في حجرتهم والاهل وصلوهم وسارو عنهم ..
يلس خليفه على الكرسي يطالع حصه .. شو بيقولها الحين .. كان يشوفها وحده ثانيه مب حصه الي كان يعرفهااا...
حصه ما كانت تبى ترمس خليفه كان نفسهااااا يقوم خليفه من جدامها ولا يرمسهااا
خليفه : حصه ..
خليفه كان يبى يرضي خاطر بنت عمه وزوجته .. بس حصه ماكانت تبى تسمع شي كانت تعبانه ومن كل شي ..
قامت حصه وبدون ماترد عليه .. وكانت بتطلع من الحجره ..قام خليفه ومشى وراها ومسك ايدهااا ..
خليفه : ارجوج حصه لاتعامليني جذيه ..من الي صار امبينا ذاك اليوم وانتي وحده ثانيه .. حصه تكلمي قولي شي .. طلعي الي فيج ..ضاربيني واجعيني بس لا اتمين ساكته جيه..

حصه ماتقدر ترمس .. شو الي بتقوله الحين .. كانت تحس بكل شي تافه حته كلام خليفه ..
التفتت حصه صوب خليفه ..وطالعته بلوم وعتاااب.. ونفس الوقت نظراتها ماكانت تخلو من الحب .. لان كان صعب عليها انها تخمد نار الحب الي في قلبها صوب خليفه ..
خليفه : ارجوج حصه تكلمي .. ابى اعرف شو مصيرنا .. شو نهاية هذا الشي ...
حصه انا ابى ارضيج ..ماابى اشوفج بهالحاله..

حصه : خليفه ماشي فايده...
خليفه : لاتعذبني اكثر حصه دخيلج .. انا الي حطيتج في هالوضع وانا لازم اطلعج منه.. ليتني كنت املك الشجاعه ذاك الوقت ..وانهيت كل شي ..ولا اني اخليج بهالحاله ..

حصه في قلبها كانت تقول .. شو تقدر تنهي ياخليفه .. حب عطيتك من قلبي نظيف وطاهر ... تبى تجتله ..؟؟ مايكفي انك رفضتني .. ارحم قلبي .. انا ماقدرت ارفض زواجنا جدام هلي .. قلبي ماقدرت عليه .. ارحمني .. قلبي يبى يكون قريب منك وانا رضيت بعذابه .. بس انته بكل الطرق تبى تبعدني عنك ..
حصه : خليفه انا بريحك مني .. بس مانبى نجرح اهلنااا ..خليفه .. اعتبرني مش موجوده في حيااتك .. انسى وجودي ..وانا بحاول مااثقل عليك .. لين ربنا يكتب افراق .

الجزء الثالث

عبرتي هليتها حزن وبكيت ... ياردا عمر الحسوفه ماجنى
ذقت من دنيا حبيبي وماارتويت... جنت الدنيا حبيبي والمنى

مر اسبوع على حصه وخليفه وهم في فرنسااا..كانو يطلعون بالغصب علشان بس يغيرون جو الفندق..وحصه كانت ماترمس خليفه مول ...وخليفه كان وده حصه تحن عليه وتنسى غضبها عليه شويه..لانه تعب من هالحاله ومايقدر يستحمل زعل حصه هالكثر..

خليفه: الغلى خفي عليه شويه ..كيف اهون عليج هالكثر محاربتني ..لاتنسين انا ولد عمج..وانا مثلج مالي يد في الي صار .. لاتحمليني كل هالعذاب ..حصوه مب بس عاد..!!؟؟

حصه : شو الي بس .. !! خليفه انا احاول ماايي صوبك ولا اضايقك ..لو سمحت خلك ابعيد عني .
خليفه : وبنيلس طول هالشهر جيه .. على الاقل قلنا اننا خوان ..ورضينا بالهوضع ..بس بعد ردي الصوت عليه ..لاتخليني ارمس عمري .
حصه : شو تباني ادق سوالف وياك .. قدر اني انا مجروحه .. وانته صدمتني .. اه ياقلبي .. انا ابى ارد لبلاد ..ابى امايا ..
خليفه: مابنرد لبلاد ..لين ماتصطلبين وتخلينا نتراضا. وماابى شي يتم في خاطرج عليه ..

حصه مب عارفه كيف ترضى على خليفه .. ولو رضت عليه ..كيف تعيش وياه وهيه تحبه .. تموت فيه .. وماتقدر تنول الانسان الي تحبه .. وهوه جدامها ..!!

حصه ماهان عليها خليفه تعذبه : اوكي خليفه انا ماشي في خاطريه عليك .
خليفه : اباج تضحكين ..
حصه : بضحك انشالله
خليفه :انزين ابتسمي وحشتني ضروسج هههههههه
حصه : مالت عليك خلاص غيرت رايي مابضحك
خليفه : افا ياحصوه ..
نشت حصه وشلت مخده وفرتها على خليفه وسارت داخل غرفتها... ضحك خليفه عليها وحس ان في امل تتغير حصه وترضى عليه ..

فليل دق عليها الباب بس ماردت عليه ... تم يزقرها وبعد لبسته .. خاف عليهاااا ..بطل الباب ولقاها واقفه تطالع من الدريشه ..
خليفه : حصه شي بلاج؟
حصه : لا خليفه ماشي ..
خليفه : تعالي بنظهر بنتعشا خاري..وبنغير جو
حصه : خليفه انا ابى ارد لبلاد
خليفه : مايصير نرد الحين يابنت الحلال
حصه وهيه خانقتنها العبره : دخيلك خليفه ابى ارد لبلاد.. مب قادره استحمل اليلسه اهنيه تقول سجن ...
وتمت اتصيح مب قارده توقف ..كأنها فجت ادموع كانت حابستهن اسنين ..ماقدر خليفه يشوفها في هالحاله ..سارصوبها ومسك راسها وضمها صوبه..
خليفه : بس الغلا لاتصيحين ..الي تبينه بيمشى ..الحينه بسير اشوف اذا في حجوزات وبنسير ..بس بس لاتصيحين ..
يلست حصه على الكرسي ماتحملت ايدين خليفه عليها ..حست يدينه مثل النار على جسمهاا ..
حس خليفه ان بنت عمه تنفر منه... وكان خايف انها بدت تكرهه .. تعذب في داخله ..مايتحمل ان بنت عمه تكرهه وهوه يعزها ويبالها الخير..

ظهر خليفه من حجرتها وطلع برا الفندق ...كان بيسير يشوف اذا بيقدرون يسافرون بالباجر علشان كان يبى يريح بنت عمه ... حصل خليفه حجر بالباجر ورجع الفندق علشان يخبر حصه ..
يوم دخل لقى حصه طالبه العشى ومرتبه الطاوله وتترياه.. دخل خليفه وهو مستغرب من حال حصه وشو الي بدلها ..!!
حصه : انا اسفه خليفه ..انا راجعت عمري وشفت نفسي وايد مزعجتنك ..سامحني
خليفه فرح في داخله : لاحصه انتي ما تزعجيني ولا شي بس سامحيني انا ما كنت حاس بج وبعذابج هنيه خليتج لين ما انفجرتي مره وحده وقلتي انج تبين اتردين لبلاد..

حصه :وانا اسفه اني ظهرتك في هالجو عسب تشوفلنا حجز علشان انرد لبلاد..
كانت ادموع حصه تنزل من اعيونها ..مايهون عليها خليفه مهما يكون ..

يلسو يتعشون وكان الجو امبينهم حلو.. يسولفون اشوي ومرات يسكتون..خبر خليفه حصه انهم بيردون باجر لبلاد..هيه استانست انها بترد لبلاد بس بعد اتضايقت اشوي لانها خربت على خليفه اليلسه ..بس قالت شو الفايده انحن اهنيه تلمنا اربع يدران ومع ذلك حابسه احساسي ناحية خليفه مااقدر اطلعه..وخليفه مب مفتكر بي وكل هذا بس مظاهر جدام الاهل ..والله يعلم كيف بنقدر نكمل ولين امته..؟؟!!

رجعو لبلاد ولقو الاهل كلهم في بيتهم يستقبلونهم ..
ام حصه : وااااايه فديت روحكم انا .شو ماعيبتكم اليلسه اهناك اشوفكم رديتو بسرعه؟؟
خليفه: بنتج خالوه حشرتني تصيح كله تقول ابى امايااا
حصه: ههههههههه شو والله اول مره افارج اهليه مااقدر اصبر عنهم هالكثر ..
ام خليفه:انشالله استانستو اهناك؟؟
خليفه: أأأوه يالوالده لاتتخبرين ..البقعه حلوه و الجو و الخضره و الوجه الحسن ههههه
ظبيه :و منو الوجه الحسن عاد ؟؟ الفرنسيات و الا حصوه ؟؟ ههههههههه
روضه: اكيد حصوه ..شو تتحرين اخوج يقدر يطالع يمين و الا يسار ..حصوه كانت بتخبقله اعيونه هههههههه
ام خليفه : اهبن عنبوه شو تخبقله هاي ...الا هوه من خاطره مايروم يشل عينه عن حصه ..
خليفه: ها شي اكيد ..وبعدين انا لو يحطولي الحص في صوب والماي والاكل في صوب مابجبل الا عليها ..هيه اكلي وشربي وحياتي كلها .. هههههههه
حصه : اي عيني ...عنبوه امين اتظهر انته هالرمسه ما سمعتني اياها هناك هههههههه
خليفه : ليش حصه وانا لازم اقول ماكنتي تقريت هالشي في عيوني..؟؟
حصه : شو قالولك ساحرة بهلا ..هههههههههه
ظبيه: عيل اشوف الرمسه ظهرت اهنيه ..اظني ارتاح باله اخويه اهنيه وقدر يعبر .. ههههههههه
خليفه : والله تبين الصدق ياختيه توها الحص حسستني بالامان كنت خايف اهناك مااروم ارمس ههههههه
حصه : يعني انا الحين كنت مزيغتنك ..... اااااه منك انته ..

بعد مايلسو وفجو الشوق من بعض نشو الاهل بيسرون بيوتهم ويخلون المعاريس يرتاحون..
دخلت الخدامه الشنط في حجرة حصه وخليفه .. دخلت حصه بتتسبح وتبدل .. بس ماعرفت خليفه وين بييلس .. كانت تبى تظهرله ثيابه علشان خليفه كان بيرقد في الغرفه الثانيه ..
دق خليفه على حصه الباب وبطلتله اياه.. سار خليفه صوب الكبت بيظهر ثيابه.. طلع الي يباه وسار بيظهر ..حز في نفس حصه هالموقف.. ماكانت تتوقع ان الانسان الي كانت تحلم به وتفكر فيه وتتريا اليوم الي ايي و يلمهم فيه بيت واحد ... وبعدين تلقاه جدامها وتموت غصه يكون هوه في صوب وهيه في صوب ...

عشت بحلام الهوى ليل وبنيت ...كل امالي تداركها الفنى

عاشت حصه وخليفه على هذا الروتين ..كل واحد في غرفه مايلمهم الا الغدا والعشا..واحيانا كان خليفه ياخذها ويسيرون يتعشون مع اهله والا اهلهااا ..
كانو في نظر الكل اسعد عروسين .. بس امبينهم كان الاتفاااق يحرمهم من بعض ..
حصه كانت يوم عن يوم تتعب وتتعذب .. الحياه صعبه على هالحاله ... وخليفه يوم عن يوم بدا يحس بحصه انسانه جديده بالنسبه له..يمكن حب حصه له ومراعاتها لمشاعره خلنه يراجع نفسه ويبدا يحس بحنان ناحيت حصه ..

مر شهرين على زواج حصه وخليفه ...وبدا موسم الدراسه الجديد.. البنات كلهن يتجهزن للدراسه في الجامعه وحصه معاهن.. وكان الكل ينتظر خبر وصول ولي العهد من حصه وخليفه ... بس لاخبر........!!

الاهل بدو في السوأل وكل يوم يتخبرون .. وحصه تقولهم انشالله على خير هذا بيد الله ...
كانت حصه تدرس وترد البيت تنام وتقوم على العصر تذاكر ..وماكانت تشوف خليفه الا فليل على العشااا ... كان خليفه ايي ويتغدا بروحه وييلس يتريا حصه ..ومرات يرقد عنها ... كان وايد يشتاق الهاااا وبدا يتوله عليها لانه مول مايشوفها الا على العشا.

حصه بدت تتعود على هالوضع امبينهم .. ماتعرف شو تسوي غير انها تمرر الايام على خير ..بس لو تفتك من اهلها الي يتريون خبر حمالها ..
ياهااا خليفه وزقرها علشان يسيرون بيت ابوه ..
خليفه : الحص تعالي بنسير بيت الوالد
حصه : والله متولهه عليهم كأني اتخيلهم الحين يالسين في الحييره ومورين الضو ....خاطريه اييلس على الضو ...
خليفه : ههههههههه يالله عيل سرناا .. بديويه تموت على الضو ههههههه
حصه : ههههههههه لي الشرف اصلا
سارو خليفه وحصه صوب بيت ابوه وهم يمشون واول ماوصلو جريب من اهلهم مسك خليفه ايد حصه وهم يمشون صوبهم .. ارتعشت حصه من مسك خليفه إيدهااا ..حست بالحب الي في قلبها بينفجر تمت ماسكه عمرها ...كيف خليفه مايحسبها ..لو يدري كيف هيه تحبه جان ماسوى هالشي ابهااا .. وهو مايحس ولو يحس بحب ناحيتها مامسك ايدها بهالبرود وخلاها تتعذب ...
وصلو الحييره وسلمو على اهلهم .. يلست حصه حذال الضو ويلس خليفه حذالها .. كانت تسولف ويا بنات عمها وهيه مستانسه .. شعور خلها تحس بالالفه والحب بين عايلتها وهم مجتمعين مع بعض وعلى الضو .. وخليفه عدالهااا يضحك ويسولف ... اااااه والله عذاب .. احبك ياخليفه وليتك تحبني وتحس بعذاب قلبي .. تمت حصه تطالع خليفه .. تشوف اعيونه وويه على ضوء الضو.. محلاه.. خليفه يجنن وايد حلو ... ليت قلبك يكون ملكي وارتاح..
بنات عمها حسن بحزن في عيون حصه ... ماعرفن شو بلاها .. من زمان وهن يحسن ان حصه مب مرتاحه ..بس ماقدرن يفاتحنها في شي .. ياترااا حصه كيف عايشه مع خليفه ؟؟ وكيف خليفه يعامل حصه ؟؟ حبها ؟؟تقبلها والا بعده؟؟ تساؤولات ادور في بال ظبيه وروضه .. بس ماشي اجابه..

بعد اشوي اشتهن البنات يسون جاي حليب ويشون بطاطا في الضو .. قامن وخبرن الخدامه تيبلهن السامان .. و يسون الحليب..خليفه وخوانه وامه وابوه كلهم ايلوس ..ويسولفون وام خليفه تعدل القرص على الضو ..وعقب نشن البنات بيعدلن الجاي ..كان خليفه يراقب كل تصرفات حصه .. كان انتباهه كله صوب حصه..يلستها قومتها رمستها .. كان يطالعها بكل حب وطيبه ..اهله لاحضو هالشي وستانست امه .. كان خليفه مب منتبه لحد كأنه اول مره يشوف فيها حصه ... بس حصه كانت مشغوله تعدل الحليب .. كانت حصه تشل الحليب من على الضو وماحست بعمرها الا والحليب ينجب عليها وتنحرق من عند اريولها كامل .. نشو كلهم عند حصه ونش خليفه يصرخ على البنات يربعن اييبن ثلج وشل هوه حصه وربع ابها صوب السياره حطها فيها ويابن البنات الثلج وساربها على طول المستشفى..
في المستشفى كان خليفه محتشر على كل الي في المستشفى على السستروعلى الدكتوره ماكان يعرف شو بيسوي حصه تتألم وهوه مايقدر يشوفها جذيه .. كانت الدموع تنزل من اعيونه .. اخواته كانن يهدنه ..وبعد مالفو حروق حصه وعطوها ابره عن الالم رخصوهم يردون البيت .. وهم ظاهرين كان خليفه شال حصه موديها السياره وهيه حاطه راسها على جتفه ... حست بيدينه وبالامان بين صدره... حست بحب خليفه الها وخوفه عليهااااا ...ونامت حصه وهيه بين ايدين خليفه ..وفي البيت ..كانو الاهل كلهم محتشرين وخايفين على حصه ..

ياب خليفه حصه وحطها في غرفتها وقالهم انها نايمه ومب لازم حد يوعيها علشان ماتنش ويردلها الالم ..
تمت امها ذيج الليله عندها .. وخليفه يظهر ويدخل عليها .. حصه كانت محمومه ..وتعبانه ..خليفه كان قلبه يعوره كل مايدخل ويشوف حصه تتألم والا يسمع صوتها تتأوه.. يو امه وابوه فليل وباتو عندهم بعد.. وبالباجر ين روضه وظبيه بييلسن عند حصه .. نشت حصه وكانت احسن من قبل .. تمن البنات يخبرنها عن خليفه وكيف كان خايف عليها .. وعن الي سواه من شافها تعبانه .. خليفه كان يالس في الصاله يسمع رمستهن .. وتوه حس بعمره وخوفه على حصه ... رفع راسه وقال ياربي ... معقووووله معقوووووله انا احب حصه وانا مادري ...كيف ومته... شو هالقدر الي يضحك علينا ... كيف احب حصه ..بعد مااختربت علاقتي ابهاا..عقب ماغدت شبه مستحيله ..
كان خليفه يبى يشوف حصه ...نش وسار صوبهن ودق الباب وحدر ... شاف حصه كيف طايحه على الشبريه وويها تعباااان وكانت تضحك ويا بنات عمها ..كانت تمثل الهن الدور وتكمله على اساس ان خليفه اصلا يحبهاا من زمان ..ماكانت تدري بشعور خليفه اليديد صوبها ولا ان هالخوف كله كان اصلا حب حقيقي ناحيتها من خليفه ..

خليفه: خوزن عن حرمتيه خلني ايلس حذالها
ظبيه : ههههههههه انشالله مانروم نقول شي نخافك تضربنا وتروغنااا
خليفه : محشومات بس خلني اشوفها مايسد انها زيغتني عليها .. الحين ابى ارمسها واسمع صوتها واتطمن عليها
روضه : ياويلي انا على حب قيس وليلى ..الي يشوفكم الحين مايقول هذا هوه المغصوب عليها ههههههه
من قالت روضه هالرمسه تغير ويه حصه وخليفه ... تمنو لو ان روضه مانطقت الي قالته .. حس خليفه ان علاقته بحصه بترجع مثل اول يوم عرفت فيه حصه انه خليفه مغصوب عليها ..

تمو كلهم ساكتين ..
روضه: انا اسفه خليفه ..ماكان قصدي الي قلتله ..سمحيلي حصه..!!
وظهرت على طول ترخصت ظبيه وتبعت اختهااا .

حصه : عادي خليفه ..اخواتك كانن يدرن من زمان ولاخبرني من قبل ..انا انخدعت فيكم كلكم ..كلكم كنتو تبون تمشون السالفه وانا ماادري ..شو الي بيستفيدونه الحين شو شو خبرني ..؟؟
وبدت الدموع تتجمع في عيون حصه .. ومااستحمل خليفه هالشي ..
خليفه : حصه فديت روحج يالغاليه .. لاتظايقين بعمرج..الي صار صار وانتهى ..وانا وانتي النا حياتنا وانا اوعدج محد بيتدخل في حياتج دامني حيي .. انا بوقف معاج في الي تبينه .. وصدقيني ياحصه عهد عليه اني اكون لج عون وماتخلى عنج دامني حي .. والي فيه سعادتج انا بسويه لج ولو على قص رقبتيه.

نامت حصه هذيج الليله بعد ماعطاها خليفه الدوا ويت امها بتنام عندها بس خليفه اقنعها انها ترد عند ريلها وانه بيكون مع حصه وبيسهر عليها ..

انتبهت حصه فليل ولقت خليفه يالس على الكرسي حذال الشبريه .. وكان موطي راسه وراقد .. حصه ماتروم اتنش من الحرق وريولها ملفوفه ..كانت تبى تودي خليفه لحاف علشان يتلحف وخاصه ان الجو شتا وبرد...خوزت اللحاف الي عليها وحطته على خليفه وتمت هيه متلحفه بلحاف ثاني .. انسدحت وتمت تطالع خليفه..
صدق خليفه كان خايف عليها جدام اهله والا كان يمثل هالشي ..!! لو كان يمثل جدام هله عيل ليش هوه الحين يسوي وياها كل هذا...!! يسهر عليها ويهتم ابها حته الرقاد مارقد وباين على ويهه التعب والسهر ..حس خليفه بعيون تطالعه ..فج اعيون وشاف حصه منسدحه وتطالعه .. ابتسم الهاااا وقالها ..:شو حصه شحالج الحين؟
حصه: دامنك انته تسهر عليه وترعاني اكيد ان حالي بيكون احسن

ارتاح خليفه من معامله حصه له .. ومرن الايام والحادث الي استوى لحصه قرب وايد امبينها وبين ولد عمهااا ... كانو مايفترقون عن بعض .. كان خليفه هوه الي يرعاها ويأكلها ويشربها ويظهرها يوديها من الحجره للصلاه ويظهرها برا ايلسها خاري تغير جو..

لين ماتحسنت حال حصه وقامت تستغني عن خليفه ... دخل خليفه على حصه الحجره الصبح ..كان ياي بيوديها الحمام تتغسل ويظهر عنها .. يوم حدر حصل حصه ناشه وتوها ظاهره من الحمام .. وقف تم يطالعهاا .. وحز في نفسه كيف ان حصه استغنت عنه وقامت بروحها ..يعني حصه الحين ما بتحتاج لخليفه .. حصه تقدر تمشى و تظهر و تاكل بروحها ..كان مستانس ان حصه ردت تمشي ويشوفها بعيونه واقفه جدامه .. بس بعد حس انها ابتعدت عنه.. كيف الحين بيكون قريب منها ..!! كيف بيدخل عليها كل وقت ..!! و يشوف طلباتها ويأكلها ويشربها ..
سارت حصه صوب خليفه ..
حصه : صباح الخير .. شو بلاك ..ليش ويهك تغير مره وحده؟
خليفه بعد مانتبه لعمره: لا الغلى ماشي بس كيف قمتي ..؟؟
حصه :البركه في دكتوري ماقصر .. انا الحين صحيت خلاص ههههه
خليفه: يعني خلاص مابتحتاجين لدكتورج الحين في شي ؟؟ هههه
حصه: وانا اقدر استغي عنه اصلا .!! بس هوه شكله بيفتك مني وانا خلاص ماابى اثقل عليه اكثر ..
خليفه: ومنو قالج لاتثقلين ..ثقلي ثقلي ماماه على قلبه عسل والله هههههههه
حصه : ههههههههههه لا مافيه هوه غصب متحملني في بيته لو طولت اكثر بلقى عمري مفروره في بيت الوالد ههههه
خليفه : افااااااا والله هوه بس عليه ان عنده مريضه بهالحلاه والدلع وين يفرهاااا ..ولا تبينه يتسفر من الجهات العليا ههههههه
مشى خليفه صوب حصه .. وطالع اعيونهاا ..
خليفه: حصه شي مضايقنج اهنيه؟؟
حصه: لا والله ياخليفه انا احس اني مابرتاح في مكان كثر ماانا مرتاحه اهنيه .. احس ان لا اهليه ولا هلك يفهموني والا يحسون بي ..
قال خليفه في خاطره يعني بس لنهم ظلموج ويايه انتي تفظلين تيلسين اهنيه عنهم .. ليش ياحصه ..انا ماقدرت اريحج ..!!
خليفه : مهما يصير ياحصه هذا بيتج ولو انتي مب مرتاحه في اي مكان اتمين اهنيه وانا الي اظهر ...
انتفض قلب حصه كيف هوه يظهر ..عيل هيه بتيلس لمنوه ..!! لا ياخليفه انا البيت بلياك ماباه والدنيا كلها بلا دخلتك عليه ماباها ..

انتبه خليفه لعمره ولحصه ...الامور تطورت امبينهم وايد .. كل واحد يحس بغلاه عند الثاني ..بس حصه تقول يمكن العشره ووجودنا في بيت واحد طول هالمده خلتنا جذيه ..وخليفه يقول ...كيف اقدر اخلي حصه تحبني مثل اول .. هيه كرامتها مجروحه منا .. واخاف لو ابين الها حبي ترفظني .. وتخلي البيت وتروح عني ... ااه يالدنيا حته حبي مااقدر ابينه الهااا .. خليفه تم يخاف انه يفقد حصه في اي لحضه .. كان يخاف ان اليوم الي تقرر فيه حصه انها تظهر من بيته يقرب ومايعرف كيف بيواجهه والا شوه بيقولهاااا .. فضل انه يسكت ويكمل معاها ويتحاشى انه يضايقها باي شكل ..

قف وناظر دمعتي يوم ادرجت ... يوم شفتك ناوي ترحل بعيد
يوم كلمتك وصديت ..افرجت... اذهلتني دمعت الحزن الاكيد

في بيت حصه كانت العايله مسويه عزيمه والاهل كلهم ميتمعين وحصه من الصبح في بيت ابوها ترتب مع امها واختها مريم للعزيمه ..وخليفه كان عند الرياييل .. كان ولد مريم سالم يحبي.. وكان كل مايحبي ... يظهر عند الرياييل في الميلس يروح خليفه ايشله ويرده عند الحرمات وامه.. وكانت حجه له انه يدخل ويشوف حصه ويرمسها كل شويه ..

مريم : حشه مب ريل عاد ماخذه .. شو مسويتبه مايخوز عنج؟ ههههههه
حصه : الله واكبر عليج .. قل اعوذو برب الفلق ..خوزيني انا وريلي من بالج.. والله انتي يدودتج سحره لاتخربين بيتي وتنفدين ريلي هههههههههه

ام خليفه: فديت انا الحص .. قومي هاتي لبان بندخنكم ماعن ثرنا على عينها هالساحره . ههههههههه
مريم : ماعليه خالوه انا الحين استويت ساحره ... فديت انا بو سالم وين هوه ما ايي ويشوف شو تسوون بحرمته ويشلني .. امايه ليش ساكته ماتشوفين اختج وبنتج هههههههه
ام حصه : ماقالن شي انتي الي يايه انتي وزيرانج.. بطفرين بالريال عن البنت خليهم الله هادنهم ههههههه
ونفس الوقت حدر خليفه شال سالم ..
خليفه: ها الولد مال امنوه ..؟ انا خلاص قررت اشله اشوف محد يرعاه جنه مب مال حد هههههههه
مريم : خيبه وانا احمل واربي واتعب وانتو تشلون ههههههه لا يابويه هاتو حق عماركم ياهل ..هكي بسم الله عليها الحص تروم تيبلك بدال الواحد عشره ههههه
ام حصه : حصه الدراسه ملهيتنها ماتجابل ريلها وتحمل وتيبله ياهل يفرح به .
ام خليفه: عنبوه شو بلاهن البنات الحين الي بتعرس يبالها سنه سنتين وخلاف يالله تحمل ...!!
ام حصه : حصه بنتي سيري تعالجي ..هاتي عيال لعمج وحرمته مستقطعين على العيال وانتو مره ولا هامنكم .
ام خليفه: حصه امايه لاتمين جيه جانج ماتدلين درب الدخاتر بنوديج ..؟

تمت حصه ساكته ماتعرف شو تقولهن وخليفه واقف يتسمع ومب عايبنه الي يقولنه لحصه ..
خليفه: لاتعورن راسكن انتن بهالسالفه .. وحصه يوم اباها انا تيب لعيال بتيبهم .. وانحن تونا شباب والعيال ماعليهم اعيله ..صح حصه؟؟
كان خليفه يطالع حصه ونظراته كلهااا حنان ..
حصه: صح كلامك بس بعد لعيال امرهم عند الله انحن مالنا يد في هالشي
نشت حصه وطلعت فوق حجرتها ..واشوي وان خليفه لاحقتنهااا .. حس ان حصه تضايقت منهن ولا استحملت كلامهن ..
دق عليها الباب ودخل ..
خليفه: حصه ماعليج من رمستهن بيرمسن وبيسكتن .
حصه : خليفه انا ...
خليفه : شو حصه شو بلاج؟؟
حصه: خليفه خلاص لازم نخبرهم كل شي ...!! مااقدر اتحمل كلامهم هذا دوم .
خليفه : يعني خلاص ..
حصه : خلاص ياخليفه ..

ماعرف خليفه شو يقول دارت به الدنيا لا مايقدر يخلي حصه تروح عنه ... مستحيل ..
طلع خليفه من عند حصه وماقدر يرد عليهاااا.. ظهر من البيت وطلع ... نزلت ادموع خليفه حزن والم مب عارف شو يسوي لحصه ..خلاص يعني حصه بتخليه..!!

[SIZE="5"]الجزء الرابع ...[/SIZE]

تدري اني موت احبك...وان مـــالي غير حبــك
والي ينبض في ضلوعي ...ماهو قلبي هذا قلبك

تملك حصه احساس بالخوف والحزن ...حياتها ويا خليفه قربت تنتهي .. قلبها تعلق خليفه يعشقه ..وحصه ماتقدر تودر خليفه .. وخليفه ماطلب منها انها تخليه... حصه قالت في نفسها.. خليفه لين الحين ماقالي اننا لازم ننهي وضعنا هذا ... خليفه وايد طيب ويايه ... يداري عليه ..يراعي مشاعري ... ماريضى عليه اي شي يضايقني ... تذكرت كيف خليفه يعاملها ..تذكرت وقفته معاها يوم تعبت .. تذكرت طيبته وحنانه... نزلت ادموعها .. لا لا لا مااقدر اخلي خليفه .. خليفه روحي وقلبي وحياتي والهوى الي اتنفسه... ياربي شوفلي حل يريحنا ... ياربي خل خليفه يحبني انا مااقدر اعيش بدونه ...

وخليفه في سيارته يتمشى في الشوارع .. يفكر في حصه ..حصه الي بحنانها وطيبتها ودلعها قدرت تملك قلبه .. قلبه الي عمره ماتوقع انه يقدر يحب الحص... خليفه كل ما يمر ويه حصه جدامه ..يرتجف قلبه و تذوب كل شراينه .. حصه تملكته سيطرت على كل ذره في جسمه.. حياته عمره روحه حصه ...كيف يقدر يخليها ... تعود عليها وعلى سوالفها ..تذكر ايامه معاهااا يلساتهم طلعاتهم سوالفهم ... كان اول مايقوم يصبح عليها اول شي... وما يظهر من البيت لين مايشوفها وييلس يتريق وياهاا ..كان يصبلها الجاي بيده ويحطلها الاكل في صحنها بيده .. كان لا إرادي مايخليها تسوي شي في البيت من يشوفها ماسكه شي سار عندها وخذه من ايدها وزقر الخدامه تسويه ... كان يباها بس تيلس تجابله ويتخبره شو سوت في غيابه ... كان يتذكر يلستهم فليل رباعه وهم يطالعون التلفزيون ... كيف كانت تنسدح على الكرسي وتلحف اريولها بالمخده وتيلس تطالع التلفزيون... كان خليفه في الايام الاخيره ينتهز الفرصه ويقعد يتأمل حصه وهيه ماتدري...كان ييلس يتابع وياها الافلام بس علشان ييلس وياها مع انه مايحب يشوف التلفزيون وايد...

اااااه ياقلبي خنتني حبيت بعد فوات الاواان ..البنت الي خسرتها... يوم كانت ملكي وسعادتنا في ايدي ضيعتها ... ورفظتها ..وجرحتها رغم انها كانت تباني..والحين انا الي اتعذب هذا زرع زرعته والحين بحصده ..بحصده الم وشوق وحزن ماينتهي ..
ماقدر خليفه يتخيل نفسه ان بيرد البيت ولا بيلقى حصه فيه .. وعلى اول الصبح بعد ماقضى خليفه ليله كله وهوه يحوط في الشوارع ويفكر بحصه .. رد البيت ..وماكان عارف كيف بيتحمل البيت بدون حصه ..

ومن رجع خليفه البيت ماكان متوقع انه يلقى الحص اترياااه مثل قبل ... كان يتوقع انها بتم في بيت ابوها وتنهي موضوعهم.. بس من وصل للبيت شاف الباب يتبطل وتظهر منه حصه ... ماصدق اعيونه ..حصه هنيه ..عندي .. سار صوبها ووقف يطالعهاااا ..يطالع اعيونها ويها يديهاااا ..نزل خليفه وركع على اريوله ومسك ايدين حصه ..قعد يبوسهن ويضمهن ويصيح .. حصه ماصدقت اعيونها والي يسويه خليفه ... خافت عليه وان يكون شي استوابه..نزلت حصه على ركبها ومسكت راس خليفه وظمته على صدرهاا

حصه : بس ياعيوني بس يانظر عيني ..لاتصيح لاتعورلي قلبي ..خليفه لاتسوي بعمرك جذيه ..شو بلااك شو مستوي عليك ..؟؟

ماكان خليفه يقدر يسيطر على مشاعره بعد ماحس ان حصه بتروح عنه ..من شافها ركع عند اريولها وباااس ايديها وتم يصيح ..خليفه حب حصه حب جنوني كله خوف والم على انها في اي لحضه يفقدها و تروح عنه.. حصه ماتعرف ليش خليفه استوى ضعيف جذيه..طول عمرها كانت تشوفه قوي وعمرها ماتوقعت انها تشوف دمعه تنزل من عيونه ...
قلبها عورها على خليفه تمنت لو الدنيا تنشق وتبلعهااااا ولاتشوف دمعة خليفه..

خليفه: حصه سامحيني .. حصه اطلبي الي تبينه بس تمي اهنيه لاتروحين ..
حصه مافهمت شو يقصد خليفه ..ليش ما يباها تروح ليش هوه يصيح ويطلب منها هالطلب..!! شو الشي الي يخليه يباها عنده..!!
حصه: ليش ياخليفه ليش ...؟؟
خليفه : حصه فكري لاتتسرعين انحن بعدنا ..شو بيقولون اهلناااا شو بتقول الناس عناااا ..

ماعرفت حصه شو تقول لخليفه ...هذا السبب ياخليفه اهلنا والنااس ..!! وانا ..؟؟ ليش انا ماتسويلي اعتبار ..بس علشان اهلك والناس تباني اتم عندك..؟؟ اه ياقلبي خليفه ما حبني ولا بيحبني .. خلااااص ..خليفه يذل عمره جدامي عسب اهله والناس ..!! لهدرجه هم وايد يعنون له ..(وانا واحساسي صوبك .. وتضحيتي علشانك.. ليش ياخليفه ليش تشوه احلى صوره رسمتها لك في قلبي ... ليش طلعت جذيه .. ياللاسف .. تصورتك انسان غير... و في النهايه خيبت لي كل امالي واحلامي فيك ..

سحبت حصه نفسها من خليفه ونشت عنه ..نشت عنه ودموعها مزرت اعيونهاا .. تبى تصيح تبى تصارخ ...تبى تقول لخليفه انا احبك .. انا احبك حرام عليك تعذبني جيه ..

سارت حصه صوب الباب وقالت لخليفه : خليفه انا بتم ويااااك بس اطلب منك طلب واحد ياليت ماتردني فيه ...
مشى خليفه صوبها وكان وده انه يضمها كان وده انها ماترمس بس اتم في حضنه ..
خليفه : الحص انتي مش بس تطلبين طلب واحد ....انتي طلبي عمري كله وانا اقدمه لج ..

حصه : تسلم ياولد عمي ...عمرك غالي عليه ... خليفه انا بيلس وياك لين اخر هالسنه.. وبعدين ابااك تنهي كل شي وتطلقني ونفترق على خير ..

كلام حصه نزل على خليفه مثل البرق ...شلت كل جزء في جسمه ... لا ..مستحيل ..
وانا كيف اعيش بدونج ...كيف اكمل عمري يابعد عمري وكلي وهلي وناسي..

تم خليفه ساكت ماقدر يرد عليهاااا ...والالم الي حسبه من كلام حصه يمزقه ويجتله..
حصه : اتمنى انك تكون سعيد ومرتاح عقبي ..والله يعوضك انشالله بالانسانه الي يختارها قلبك وتسعدك.. اتمنالك من قلبي ان الله يوفقك ..

ماقدرت حصه تكمل رمستها خنقتها العبره وربعت صوب حجرتها ...تم خليفه واقف برا البيت وكلام حصه يتردد في باله ...شو الانسانه الي يختارها قلبك ...!! مافي انسانه بيقدر يختارها قلبي ياحصه ...لان قلبي مب ملكي خلاص ...انتي ملكتي قلبي واسرتيه عندج...قلبي ملكج.. خادم عندج .. قلبي اسير وانتي الي اسرتيه ...قلبي سجين وحبج هوه سجانه ..

مرت فتره بعد هذي الحادثه ..وخليفه ساأت حالته .. خوفه من فراق حصه يعذبه ..وحصه كانت كل ماتتخيل ان خليفه بيكون لانسانه غيرها كانت تموت وتحياااا من العذاب ..ماتتحمل انها تشوف خليفه ملك انسانه ثانيه ..
بس خليفه خذلها مره ثانيه .. خليفه شوه صورته جدام حصه بكلامه انه يباها علشان هله والناس ..حصه ماكنت تدري ان الي خلى خليفه يقول جيه ...هوه حبه الها ..وتصرفه.. وذله لنفسه جدامها ...كان علشانها هيه مب علشان الناس وهله ... اااه يالقدر تلعب بقلب عاشقين تلوعهم وتعذبهم ... ليت القلوب كانت مكشوفه ..وكلن يشوف قدر حبه في قلب محبوبه ..ماكانو الناس تعاتبو وتزاعلو وابعدهم القدر عن بعض ..

مشت الايام بخليفه وحصه ..مره حلوه.. ومره مره ... كانت حصه ماتقصر ويا خليفه وكان خليفه يفرض عمره على حصه طول الوقت ... خليفه قرر انه مايخسر حصه .. وقرر ان قبل ماتخلص السنه يكون قلب حصه ملكه... ويخليها اتراجع عن قرارها هذاااا بكل الطرق ... ..بس في النهايه حصه ماتخليه ..

في يوم سارت حصه وخليفه يسلمون على حرمة اخو خليفه احمد ... كانت مربي في المستشفى .. كانو اهل خليفه موجودين واهل حرمة احمد بعد .. وناس وايد يايه تسلم .. وفي ميلس الرياييل كان خليفه وهله والرياييل موجودين ... وفي غرفة عايشه حرمة احمد ..الكل كان يتخبر حصه اذا حملت والا لا .. وحصه تقولهم انهم مايبون الحين لين تخلص هالسنه وعقب بتحمل .. كانت تتهرب منهم علشان مايسئلونها اكثر ..

يابو البيبي في حجرة عايشه حرمة احمد اخو خليفه .. ويو كلهم يطالعونه .. حصه من شافته ماتت عليه تمت ماسكتنه تطالعه وتحب اريوله وتم البيبي نايم جدامها ... سارن ظبيه وروضه زقرن خليفه وابو البيبي عسب يتصورون وياه .. دخل خليفه واحمد ومن شاف خليفه حصه ماسكه البيبي ابتسم وراح صوبهاا كأنه ماكان يشوف حد في الغرفه غير حصه .. سار يلس عدالهاا وطالع البيبي الي جدامها وباسه على يبهته وتم يرمس حصه بصوت واطي .. والابتسامه على ثمه والحب والشوق لحصه في عيونه ..
خليفه : ها حصوه اشوفج بتموتين على البيبي ..؟؟
حصه : هيه احبه
خليفه : افااا انا اغار ..
حصه : وليش اتغار بعد ..
خليفه : انا ريلج..
حصه : وهذا بيبي ...
خليفه : اذا انتي تحبين البيبي ... ليش ماتبين النا بيبي نربيه ..؟؟
كان خليفه يقولها جيه وفي عيونه يقولها انا احبج .. حبيني وتمي معايه وانسى الفراق..
طالعت حصه خليفه ... ليش يقولها جيه .. هوه يعرف ان علاقتهم ماتسمحلهم اييبون بيبي .. شو خليفه مب ناوي ينفذ الاتفاق ..!!
حصه في داخلها كانت وايد مستانسه وكانت تتخيل كلام خليفه وكلامها .. هذا الكلام كان ممكن يكون بين اثنين متزوجين وبينهم حب... مب انا وانته ياخليفه ... احنا شو امبينا غير الهم والفراق الي يتريانا ...

حصه : تبى تمسك البيبي ؟؟
خليفه : لا اتروع..
حصه : هههههههه لاتخاف دوك يود .. علشان تدرب على لعيال
احمد : شو ناوين تدربون على ولديه اشوف...!! ههههههههه
خليفه : وهقتينا ههههههههههه ... لا انا مالي حايه في ولدك ..جان حصه بس بتاخذ جرعة امومه ..
عايشه : انشالله ياحصه اشوفج شاله ولدج عقب تسع اشهور وهنيه في هالحجره يارب.

كلهم قالو آآآمين ... وتم خليفه يطالع حصه ويبتسم .. ويقول في خاطره وين بتسيرين عني والله ماافارقج ولا تفارقيني ..وماشي بيفرقنا غير الموت ..

حصه : عايشه والله جنج تدعين عليه ...وانا اشلي بالعثره وصدعة لعيااال .. هههههههههه
ام خليفه : وابوياا اناااا والحرمه منو بينفعها غير اعيالها شو بتسوين ابعمرج بروحج ..؟؟
حصه : ان مب بروحي ( وفي خاطرها تقول خليفه يغنيني عن الدنيا كلها الاهل ولعيال والناس ) الله يخليلي بو عجيل هههههههه
ام حصه : ومب ناويه تيبيله عبدالله ...بدال ماتسمينه بو عجيل ههههههه
ظبيه : انتو ليش محتشرين عليهم جيه كلتولهم جبدهم ...دوم ماعندكن الا هالسالفه خفو على البنت .. هههههههه
روضه : هيه والله حصه شو ذنبها جان الله ماكتب انها تحمل بسرعه ..واصلا حصه صغيره بعدها على لعيال .
حصه وهيه متضايقه : خليفه ابى اروح البيت ..
ام حصه : يلسو بتتعشون عقب بتسيرون ..
خليفه : لا طولي بعماركم ..مالنا حايه في العشاا ..اسمحولنااا
نشت حصه ونش خليفه ومسك ايدها وظهرو من الستشفى. ركبو السياره وتمت حصه تطالع خليفه ..خليفه كان يسوق وهو ساكت ..
حصه : خليفه ..
خليفه : لبيه الغاليه..
حصه: ماابى ارد البيت .. ودني اي مكان غير ..
خليفه : انشالله تدللي انتي بس..وين عاد تبين اتسيرين .. امري
حصه : ودني البر
خليفه : من عيوني يالغلا .

نزلو خليفه وحصه يتمشون في البر وكان المكان ظلام ...وشب خليفه ضو صغيره وتمو يالسين حذالها .. كان الجو بارد وهوى خفيف يمر عليهم والليه قمرا .. كانت حصه تطالع الضو وتفكر .. تفكر في حالها وحال خليفه ..على شوه بينتهي .. وخليفه .. يتأمل عيون حصه ونور ويها وحلاتها مغطيه على اي شي حلو في هالليله ... حست حصه بيد خليفه على خصرهاااا.. وتقرب منها وحط راسه على ريولها ونسدح .. تم يطالع ويه حصه .. وحصه استحت منه وجسمها ارتجف تحت راسه ... مسك خليفه شعر حصه الي كان نازل على طرف رقبتهاا وتم يلفه على صبعه و يلعبه .. وحصه كانت تموت على كل حركه يسويها خليفه ... ماقدرت تتحمل قرب خليفه منهااا ... تمت تقول في خاطرها .. خليفه يحبني ..؟؟!! لا مااظن هوه يشوفني مثل ظبيه وروضه ..بس ياخليفه مش لهدرجه انا مثل اختك .. انا مااتحمل قربك مني ... ولمست ايديك .. انا اتعذب ابااك احبك .. ولمساتك تخليني اموت فيك اكثر واكثر .. ارجوك ياخليفه لاتعذبني ارحمني ..

خليفه : شو فيج حصه ؟؟..
قالها بكل اهتماام وخوف لانه شاف حصه مسكره اعيونها وتفكر بحزن...
حصه : ماشي بس احس برقاد
خليفه هههههههه شو رايج نرقد اهنييه ..؟؟
حصه : لا والله ههههههه .. كيف نرقد في الرقعه لا خيمه ولا فراش ..!!
خليفه : وليش الخيمه والفراش .. مابتموتين برد انا بدفيج .. انا فراشج ولحافج ودفاج.

حصه تبريدت اعظامها من سمعت رمسة خليفه ... شو يبى هوه بيجننهاا ... بيخبلهاااا
حصه ماتتحمل كلام خليفه ...كان كلامه بالنسبه لحصه مثل الي اييبلك الماي وانته عطشان ويحطه جدامك وانته مقيد وماتقدر تشرب ... خليفه الماي .. وحصه عطشانه تبى تشرب حب من خليفه وتروي قلبها العطشان .. بس خليفه مثل الماي المحرم عليها انها تشرب منه وترتاح..
خليفه كان يعني كل كلمه قالها ..كان يطالع حصه بكل شوق وحب ..كان وده يصرخ ويقولها انه يحبهاااا ... انه يموت فيهاااا...
حصه : بسك قوم عني ... يالله روحنا ههههههههه
خليفه :صبري انزين .. انتي تمي اهنيه انا بسير اييبلج الحاف وبرد عشان نبات اهنيه شو رايج ههههههه
حصه : لاااوالله انته الي مقترح ترقد اهنيه ايلس انته وانا بسير اييبلك الحاف وبرد هههههههههه
خليفه : وين بتردين انتي هههههههههه انتي ودج لو تفتكين مني وتسيرين عني وتاكلني الذياب وتنتهين مني نهائي ههههه
حصه بخوف : لا بسم الله عليك ..يعلني اموت ولا اسير عنك ويستويبك شي ..

تم خليفه مبهت يطالع حصه ويشوف الخوف الي حل ابها من قالها انه بتاكله الذياب وبيموت ..كيف خافت عليه وكيف قالت هالكلام.. ياربي ياحصه .. انتي تحبيني ..!! لهدرجه انا غالي عندج ..!!.. انتبهت حصه انها قالت كلام قوي اثر على خليفه وخلاه يفكر ..
حصه: انته ولد عمي امانه عندي لازم اسلمك لمك بعد كمن شهر ...مافيه يقولون جتلت ولدنا وسارت عنه .
حس خليفه ان حصه ارتبكت وغيرت السالفه .. تبى تبين لخليفه انها ماتحبه وانها قالت هالشي بس لانه ولد عمهاااا..
ضحك خليفه في خاطره وقال .. معقوله ياحصه قلبج بعده يحبني وانا مادري ..!!.. والا جهودي اثمرت ويابت فايده وبديتي تحبيني من الاول ..!!!

الجزء الخامس
من غلاك افتخربك واعمل المستحيل ....لو اعاني حياتي!! خل يعشق خليله
ماعرفت المذله لا ولا انته ذليل..... عزة النفس فينا ياحبــيبي حصيــله

وعت حصه الصبح وماغاب عن بالها احداث ليله امس ..وكيف كان خليفه منسدح على ريلها وبلعب بشعرهااا.. ردت ضمت المخده وانسدحت تطالع السقف وتفكر بخليفه ..

خليفه كان نفس الشي واعي ومنسدح على شبريته يفكر في حصه ... وحلات ويها وعيونها ووده لو يقدر يسير الحين حجرتها ويوعيهااا .. كان مشتاق الهاا ... مشتاق لعيونهاا.. ااه ياحصه ليش انتي بعيد عني ..!!

على الريوق كان خليفه يطالع حصه بشوق غريب.. وحصه كانت مستغربه نظرات خليفه الهاااا
خليفه: حصه انا ابى اخذ رايج ابشي ..
حصه: خير خليفه ..
خليفه : الوالد رمسني امس على اساس انسير وياهم العمره .. شو رايج؟
حصه: والله راي طيب ونا نفسي اعمر... وبعد اللمه حلوه ..
خليفه: خلاص عيل تمام ...انا بخبر الاهل وبشوفهم مته ناوين .
حصه كانت مستانسه طبعا من زمان ماسارو العمره ...اخر مره سارت كانت من خمس اسنين
تحمست حصه للسيره وراحت رمست امها وخليفه كان يالس حذالها .. يشوف فرحتها .. حصه كانت مثل البيبي في ويها براءة اليهااااال ... حس خليفه انه يقدر يملك قلبها بسرعه لانها انسانه الكلمه الطيبه توديها و تيبهاااا... سكرت حصه عن امها.. والتفتت صوب خليفه وشافته يطالعها ويبتسم بكل حنان وحب .. اربكنها نظراته ..
حصه: امااه تقول بتشارو ابويا وشكلها تبى تروح .. ههههه يعني انشالله بنسير كلنا يميع..
خليفه : انشالله على خير ... انا بسير صوب الاهل ..بتخاويني ..؟؟
حصه : اكيد ههههههه
خليفه : يالله هاتي ايدج ..
مدت حصه ايدها لخليفه وسارو ...بيت عم حصه قريب منهم كانو يسيرون له مشي لان اليدار باليدار ..
دخلت حصه اول وشافت عمها وحرمة عمها في الصاله ودخل خليفه عقبهااا...
سلمو عليهم ويلسو ..كان ويه بو خليفه مايبشر بالخير ..تمو خليفه وحصه يطالعون بعض..مب عارفين شو السالفه...!!
ام خليفه: شحالج حصه..
حصه: بخير خالوه الحمدلله ..
خليفه: عسى ماشر الوالد ..شو صايبنك..؟؟ الويه مب طبيعي اليوم ..!!
بو خليفه: سلامتك الغالي ..مامن شر..
ام خليفه: ابوك يبى اييوز اخوك خالد ..وخالد مب طايع بالعرس الحين..
خليفه : وليش خالد مب طايع.. وشقى يرد الوالد مايمشى ع كلمته ..!!!؟؟
ام خليفه : ليش وانته اتحرا اخوانك مثلك مايرودن لبوهم كلمه.. !! هذم ها من كبرو شوي سوولهم راي وشور رواحهم..
حصه: انزين اذا خالد مايبى يعرس الحين مب لازم .. خلوه على راحته.. وانته ياعمي لاتضيق ابعمرك.. كل انسان وله حرية للاختيار ..والحين محد ينغصب على شي مايباه..
حس خليفه ان كلام حصه.. تقصده هوه به والموقف الي هله حطوه فيه.. وحصه ماكانت تريد هالموقف ينعاد على خالد..

بو خليفه: الحين يابنتي انا ابى مصلحتهم .. والريال اذا ماانتبه لعياله ويوزهم وكمل واجبه ناحيتهم مايرتاااح..والعرس ستر للريال والحرمه..

خليفه: صح كلامك يالوالد.. بس انته مب زين عليك الضيقه والتفكير .. خل موضوع خالد عليه وانا بقنعه ..وانشالله مابيستوي الا الشي الي تشوفه مناسب.

ما كان هالشي يعجب حصه.. وماكانت مقتنعه بتصرف عمها ودكتاتوريته في بيته.. ماكنت تريد معاناتها مع خليفه تنعاد لخالد.. بس الشور مب بيدها ..وخليفه مايحب يغضب ابوه ..

اقنع خليفه ابوه انه يخلي موضوع خالد عليه ..وفتح وياهم موضوع العمره.. وتشاورو على السيره وكلهم عزمو يسيرون.. ظبيه وروضه كانن وايد مستانسات وفراحانات انهن بيقدرن يشوفن حصه وايد وييلسن وياهاا..

بعد ايام... الجميع تزهبو وسارو العمره..خليفه وحصه كانو يالسين في الطياره حذال بعض..كان يسولف وياها ويرمسها جنهم توهم عرساان يداد.. الي يشوفهم كان يقول شو هالحب الي امبينهم .. ليش لين الحين ما شبع منها ..!! محد كان يدري ان حصه وخليفه تعذبو من اول يوم من عرسهم .. وتصرفاتهم وحبهم البعض ..تعبير عن مافي قلوبهم ..واحساس يترجم بدون مايحسون هم بهالشي .. نزلو في مطار الرياض ..وكانو بيباتون ليله في الرياض وبالباجر بيكملون للمدينه...
وصلو الفندق .. وخالد كان حاجز مع مقاول للرحله..وكان مرتب الهم كل شي وسياره توديهم وتيبهم وين مايبون.. طلعو كلهم صوب حجرهم بيرتاحون.. دخلو كلهم حجرهم ومابقى الا خليفه وحصه ... وصلو لحجرتهم وكانت العايله كلها حذال بعض .. حصه انتبهت انها هيه وخليفه في نفس الغرفه .. طالعت خليفه مستغربه..!!وعيونها فيهن تساؤولات ..
خليفه: لاتفضحينا جدام الاهل .. والله نسيت ..مب قاصد هالشي ..
حصه: الحين شو بنسوي..؟؟
حصه كانت تتكلم بكل براءه..
خليفه: ليله وبتعدي ..تحمليني ..
حصه ماعرفت شو تسوي ..شو بتقوله ..هيه اصلا نست سالفة الغرف ...ونست وجود اهلها وياهم..مول ماخطر هالشي في بالها..
حصه : اوكي
دخلت حصه الحجره وخليفه وراهاا وسكر الباب وراهم ..بطلها الشنطه وطلعت هيه ثيابها ودخلت الحمام بتتسبح..
خليفه انسدح على الشبريه ورقد اشوي... كان تعبان ..يوم نش حصل حصه طالبه الاكل ..ويالسه تطالعه وهوه راقد وتبتسم ... صادها في هاللحضه.. ارتبكت هيه ونزلت اعيونها عنه ..تم خليفه منسدح ويطالعها ..مب مصدق انه اول مايفتح اعيونه من النوم يشوف حصه جدامه.. تم مستانس ..
خليفه: ليش كنتي تطالعيني .. معجبه..؟؟
خليفه حب انه يمازحها ونفس الوقت يبى يكشف حقيقة شعورها ناحيته..
حصه : هيه معجبه بك ... يوم اتكون راقد بس .. ههههههههه
خليفه رفع حياته فوق وقالهااا ..
خليفه: نفسي يعني .. انا بعد معجب بج ...بس ...!!! مش بس يوم انتي راقده .. كل يوم يمر علينا تعجبيني .. وامبونج انتي اصلا تعجبيني ..والحين زاد هذا الاعجاب ...طيبتج وحلات طبعج زودته اكثر واكثر ..
قالها هالكلام في كل هدوء ... خلا جسم حصه يرتعش ...وصابها ارتباك من كلامه .....

حست حصه بالارتباك وكلام خليفه كان غريب عليها .. كأنه كان يبا منها شي ..
حصه: بس لا اصدق عمري ..بعدين بتندم هههههههه بيكبر راسي عليك و ما بتروم لي ..
حصه خربت على خليفه الجو .. كان نفسه يظهر مشاعره الهااا .. بس كبرياء حصه ماكان يسمحلها انها تتمادا ويا خليفه ..

نش خليفه وسار الحمام بيتسبح .. حصه ماتعطيني اي مجاااال اتقرب منهاا .. بس ماعليه ياحصه الايام اليايه بتجبرج انج تواجهيني وتسمعيني ..لاني مابسمح لج انج تنفذين قرارج وتبتعدين عني ...

خلص خليفه ويلسو ياكلون .. كانت حصه تعبانه وتبى ترقد .. بس ماكانت تقدر ترقد جدام خليفه .. استأذنت منه وطلعت سارت عند روضه وظبيه .. يلست تسولف وياهن وعقب انسدحت على شبريتهن وناااامت .. نامن البنات كلهن ... ونشن على صوت ام خليفه توعيهن عسب يتجهزن لانهم بيطلعون المدينه ...
نشن البنات وكانن مستانسات لان حصه راقده عندهن .. وقومن حصه علشان تتجهز.. سارت حصه غرفتها ومالقت خليفه في الغرفه... تزهبت وخلصت وشوي ان خليفه داخل عليها ..
خليفه: رقدتي البارحه زين ..؟؟
حصه : هيه نمت اشوي بعد مايلست اسولف ويا روضه وظبيه .. وبعدين خذتني رقده بدون مااحس ..
خليفه : انا اسف حصه الظاهر اني انا بتعبج في هالرحله.. بس اوعدج اني برتب الامور احسن في المرات اليايه..
حصه ماضايقها وجود خليفه معاها في نفس الغرفه ... كيف تتضايق من قرب حبيبها منها ..!!! بس حصه ماتتحمل وجود خليفه قريب منها وهوه محرم عليها .. تخاف تضعف وتبين له حبها .. تخاف خليفه لا ايرادي يقدر بحنانه وطيبته يخليها تستسلم له وتظهر مشاعرهاااا ناحيته..لان خليفه كان يعاملها كحبيبه .. كزوجه .. كان وايد يقربها منه يقولها كلام يخليها تذوب .. ماكان باقي الا انه يقولها احبج....

حصه: خليفه مب مهم المكان ونومي وين بيكون ...المهم اننا مانخرب كل الي سويناه طول هالوقت على اهلنااا... ما نبى الحين نخرب كل شي ..والا شو رايك..؟؟
خليفه: بس مهما يكون ياحصه .. و لو شو مايكون الي سويناه علشان اهلنا .. راحتج انتي بتكون اولى .. انتي عندي في المرتبه الاولى ...فاهمه ياحصه..؟

طلعو كلهم من الفندق ..و بدو رحلتهم للمدينه.. قضو في المدينه خمس ايام .. مرن كأنهن يومين ..وجود حصه قريبه من خليفه لهدرجه خلاها ماتحس بالوقت ..وكان نفسها انهم يتمون جيه وما يتغير عليهم الحال.. كان كل واحد منهم يكفيه قرب الثاني منه ولو بس في الغرفه وقت يلستهم وراحتهم ... بس فليل كان خليفه يظهر وينام في غرفه ثانيه بعيده عن الاهل ..عن لايحسون به ..

في الصبح سارو مكه .. كانت الايام في مكه مختلفه .. كانت حصه ماتشوف خليفه وايد واحيانا كان خليفه يطلع من الصلاه في الحرم ويتريا حصه عند الباب الي متعوده تطلع منه ..وياخذها يتمشى وياها في الاسواق..
حست حصه انه ايامها ويا خليفه في مكه وايد مريحه .. حست بعاطفه وحب وانه ماشي يسوى في هالدنيا علشان تتعذب وياااه ... حصه كانت تقول ..انا مابخلي خليفه .. مااقدر .. ليش اخليه ..!! معامله خليفه اليه ..وحنانه وين بلقى مثلها ..!!
حصه في داخلها كانت تبى تتقرب لخليفه .. تباه يحبها ويعيش وياها كزوجه .. حصه ماتتخيل نفسها عايشه بعيد عن ولد عمها وريلها وحبيبها ..
انا مابخليك .. انا بتم وياك لين ماتحبني ياخليفه ..لاخر العمر..

كانت ام حصه واختها ام خليفه يالسات في الصاله في شقتهم الي حاجزينها في مكه..والبنات روضه وظبيه ومعاهن حصه كانن في المطبخ يسون جاي وقهوه.. حدر ابو حصه وسلم عليهم .. ويلس .. اشوي ان البنات يايات ويايبات القهوه والجاي سلمن على عمهن ويلسن ..حصه سلمت على ابوها ويلست حذاله .. كان ابو حصه باله مشغول ومب عارف كيف يبدا الموضوع الي عنده .. قام نش وزقر حصه وسار في الحجره.. نشت حصه وسارت صوب ابوها وهيه مب عارفه ليش زقرها ..كانت مستغربه وحست ان في شي صاير عند ابوها ومخلنه جذي مهموم.. تمو كلهم يطالعون حصه والباب الي سكرته عليها و على ابوها و في عيونهم تساؤولات ..شو عندهم .. و ليش طلبها روحهم ...وليش حصه .. !!

حصه : ها الوالد امر .. بغيتني..؟؟
اشر ابو حصه لحصه علشان تي وتيلس مجابلتنه على الكرسي .. يلست حصه وهيه تتريا شو الشي الي بيقوله ابوها الهااا ..كانت خايفه ..ويا في بالها خليفه .. خافت ان ابوها يكون عرف شي عنها وعن خليفه الي يبات في غرفه ثانيه عنها ..

تم ابو حصه ساكت ومب قادر يحط عينه في عين بنته ..
بو حصه: بنتي حصه .. انا ملاحظ امر غريب اشوي .. وماابى احكم عليه ..لين مااعرف السالفه منج ..
حصه على طول حست ان السالفه سالفتها مع خليفه ..
حصه: خير الوالد ..
بو حصه: خليفه ياحصه .. خليفه وانتي ..شو امبينكم مخلي كل واحد منكم في صوب .. واذا امبينكم شي شعنه ماتخبرونا ..
حصه خافت على خليفه ماعرفت شو تقول .. تمت ساكته وتفكر .. شو اقوله .. ؟

حصه: ليش الوالد انته شو شايف علينا ..؟
بو حصه: الي شايفنه ياحصه ان خليفه يبات في حجره وانتي في حجره .. شو مستوي عليكم ..كل يوم انشوفكم رباعه تسولفون وتضحكون ..ليش عند مبيتكم ونومكم تفترقون..؟

شو بتقول حصه لبوها .. حست انها ماتقدر تجذب عليه .. بس ولو قالتله كل شي ..بيفهمها ..؟ حست حصه ان لا ابوها ولا اي حد بيقدر يفهم الي امبينها وامبين خليفه ..فقررت انها ماتقول اي شي ..
حصه: انا وخليفه ماامبينا شي ..
سكتت حصه ماكانت تقدر تجذب ..فحبت انها تسكت وماترد على ابوها بشي..
بو حصه: حصه الحال هذا اذا وراه شي كبير ...ترانا مابنسكت عنه .. واباج تخبريني كل شي .. انا ماابى اتدخل في اموركم الخاصه .. بس كوني ابوج واخاف عليج ..اذا خليفه متعبنج والا مضايقنج في شي ترا انا بتصرف وانا ماايوزليه فيج ... من انرد لبلاد تشلين اغراضج كلهن وتردين بيت ابوج .. لين مانشوف النا حل ويا خليفه ..

من قال بو حصه هالكلام خافت حصه وقالت في نفسها لا مستحيل تفرقون امبينا ... شو حياتي عقب خليفه.. وخليفه بيتم بروحه .. لا لا يابويا تجنون علينا خلونا مع بعض ..

حصه: الوالد خليفه ريال ونعم فيه .. من دخلت بيته عمره ماقصر ويايه في شي .. يرعاني ويخاف عليه ..وماشفت منه اقصور .. والي تشوفه الحين سوء تفاهم بسيط امبينا وبنحله..
ارجوك يالوالد خلونا انحن نحل الي امبينا و نمشي حياتنا ..

كانت حصه ترمس ابوها وادموعا تنزل من اعيونها .. الموقف كان صعب عليها .. فراق خليفه بيجتلها .. وماتتحمل حد يضايق خليفه والا يظن فيه ظن عوف .. مايهون عليها ..

بو خليفه: انا مابغصبج على شي .. ومااباج تخلين ولد عمج وتسيرين عنه.. بس ما اباج تهينين عمرج عند حد ... وحالتج هاي ويا خليفه تراها مب زينه لا لج ولا الناا ... ونا برمس خليفه وبشوف شو سالفته وياج ..وياخوفي تكون حالتكم هاي من تواخذتم .. حرام عليه انج ماتباتين عنده ليله عقب هاليوم .. جانه هذا حالكم

سكتت حصه .. ماكانت تقدر تواجه ابوها بروحها .. حصه ضعيفه في هالامور .. وخاصه اذا كان الموضوع فيه خليفه .. ادموعها بدت تنزل .. شو بتقول لبوها ..كانت تبى خليفه يكون موجود عندها هالوقت .. تباه ينقذ الموقف ويحله مع ابوها .. ماكانت تبى ابوها يتدخل ويحرمها من خليفه .. ااه ياقلبي ... ياربي لاتفرق امبين روحين معلقين ببعض .. ياربي لاتخلي السبب الي لمهم يفرقهم ..

نشت حصه بتظهر عن ابوها مب قادره تيلس والا ترد عليه بكلمه .. كانت تبى خليفه .. تبى تكون عنده .. بس شو بتقوله..؟؟ اهلنا درو و عرفو .. وهم يبون ينهون علاقتنا .. شو بتكون ردة فعله .. يمكن يستانس ويوافق ويخليهم ينهون السالفه ... واناااا .!!؟؟ شو بيكون مصيري ..!!

طلعت حصه ودموعها على ويها .. مرت من الصاله بتطلع بتسير صوب غرفتها واهلها كلهم يطالعونها مستغربين ... يبون يعرفون شو صار امبين حصه وابوهاا ..!!
نشت ام حصه ودخلت داخل عند ابو حصه ..وسكرت الباب .. خبر ابو حصه ام حصه بكل شي .. اضايقت ام حصه وتمت مب في حاله .. كيف بنتي تغبي عنا هالسالفه وماتخبرنا .. شو حايتها في هالريال يوم هوه زاهدنها ومايباها .. لا بنتنا مب رخيصه نخليها عنده وهوه فارنها مايباها..
كانو وايد متضايقين وطلعت ام حصه عند اختها وخبرتها بالسالفه ... اضايقت ام خليفه .. وماعرفو شو بلاهم هالعياااال ..

في غرفة حصه كانت حصه منهاره صياح .. وماتبى خليفه يشوفهااا .. كانت تقول ان خلاص يوم فراقها من خليفه قرب .. شو بسوي بعمري وبحياتي عقبك يا بعد روحي .. انا اتعذب عليك ... وانته شو بتكون عقبي .. بترتاح .. !! يمكن خليفه يرتاح ويعيش حياته عقبي .. يمكن خليفه يتريا هاليوم علشان ينهي هالعلاقه الي امبينااا.. يمكن خليفه كان يشفق عليه من جيه ماطلب مني الفراق .. تمت ادموع حصه تنزل حاره على ويهااا ..

دخل خليفه على حصه الغرفه .. ومن شافها سار صوبها وهوه خاايف عليها مب عارف شو الي حالبها .. ياها ويلس خذالها ..
خليفه : حصه الغاليه شو مسويه في عمرج .. ليش مهلكه عمرج صياح .. شو الي حلبج.. حصوه حبيبي رمسيني خبريني لاتخوفيني عليج ..
مارام خليفه يشوف حصه بهالحاله خذها بين ايديه وضمها وتم يهدي فيها .. وهيه اتصيح بحرقه .. خلاص ماتروم تيود حزنها .. وجودها في حضن خليفه خلاها ترتااااح وتصيح .. وخليفه يهدي فيهااااا
خليفه : الحص حبيبي.. بس غنااتي.. مايسوى عليج .. شو ها الي مخلنج تصيحين هالكثر ..؟؟!!
ماطاعت حصه ترمس وتخبره .. ولو خبرته شو بيقول خليفه .. في نفسه يمكن يستانس .. بس شو بيكون موقفه من حصه ... بيشفق عليها وبيخليها عنده بس شفقه عليها ...
ردت حصه وتمت اتصيح ولو شفقه انا اباك مااقدر استغني عنك خلاص .. روحي انته وعمري وكل حياتي .. لاتخليهم يبعدونا عن بعض .. قولهم انك موافق عليه ولو شفقه.. انا راضيه وما بخليك .. تم خليفه يهدي بحصه وهيه تصيح .. وبعد ماهدت .. مسك خليفه ويه حصه بين ايديه .. وتم يطالع ويها وعيونها الي هلكتهم من الصايح ..

خليفه : الحص فديت هالعيون انا .. والله انه ماشي يسوى دمعتج الي نزلت .. دموعج غاليه عليه يالغلا .. شو الحص ماتبين تخبريني شو بلاج..؟؟
رفعت حصه عيونها صوب خليفه وتمت تطالعه وهوه يطالعها .. ونفسه لو يبوس هالعيون المتخرسه دموع ..
حصه: خليفه انا خلاص بقولك .. لنك اكيد بتعرف.. اذا انا ماقلتلك اهليه بيقولولك..
استغرب خليفه .. شو هالشي الي عند حصه واهلها ..
حصه: خليفه .. الوالد عرف انك انته وانا كل واحد منا في صوب ... عرف انك انته تنام في غرفه وانا في غرفه ... وردت تمت اتصيح

مسك خليفه راس حصه وحطه على صدره وحس ان في شي كبير بيستوي ... والله يساعده ويقدر انه يرمس اهله ويتفاهم معاهم .. ضم خليفه حصه ونزلت دمعه من اعيونه .. فديت روحج يالحص وانتي تصيحين علشان جذيه .. خايفه عليه.. والا خايفه من رمست اهلج وفضيحتنا عندهم ..

نش خليفه عن حصه وقالها انه بيسير يرمس ابوها.. وطمنها على ان كل شي بيكون اوكي .. وان حصه محد بيضايقها بشي وهوه بيتحمل كل شي عنها ..

دخل خليفه الغرفه وشاف ام حصه وامه يالسات ويرمسن في سالفتهم .. سلم عليهن وتم واقف ..
خليفه: وين عمي بو محمد..؟
ام حصه : موجود الغالي تعال ايلس نباك في رمسه..
خليفه: انشالله بس بغيت عمي في رمسه وبرد عليكن..
ام خليفه: رمستك معروفه ونفس الرمسه الي نباك فيها .. تعال ويلس ..
يلس خليفه مافيه على رمست الحرمات هوه عنده كلمتين بيقولهن لعمه وينهي السالفه ومايبى حد يكبرها هالكثر ..

ام حصه: خليفه ابويا انحن يوم يوزناك بنتنا.. عديناك ولدنا والبنت بنت عمك لها الحشيمه..والي شفناه منك انك ماقدرت هالشي ..وفار البنت فرة لجلاب .. يوم انته ماتباها من الاول شعنه ماييتنا ورمستنا ..جانهم اهلك ماطاعوك.. انحن مابنطيع على بنتنا انك تنغصب عليها ..

ام خليفه: اسمينا غلطنا يوم يوزناك اياها .. مادرينا انك بتشين في البنت.. وبتلعوزها وبتخرب عليها مستقبلها ..
خليفه: سمعني الحين جانكن خلصتن رمستكن.. الحين البنت يت واشتكت الكن مني..؟؟ كد يت عندكن وقالت اني مقصر وياها في شي ..؟؟
ام حصه: حشه البنت ماكد طرتك بالشين .. دومها تمدحك وتسولف عنك.. لان البنت مب مربايه على الرمسه الشينه وحصه عمرها ماطرت حد بالشين ..
خليفه: حرمتيه ومااشتكت الكن مني .. والي امبيني وامبينها شي انتو السبب فيه .. والحين يوم انا بغيت البنت ويالس احاضيها واداري عليها تبون تخربون علينا.. وتفرقونا ..!! اسمحلي.. رمسه مني الكن الحين.. حصه محد له كلمه عليها غيري .. والحرمه حرمتيه ماحد بيتدخل امبينا ..رجاءا خلوكم بعيد وخلنوي اعيش ويا حرمتيه .. وخالوه لاتخافين على حصه .. حصه محد بيرعاها وبيحبها ويخاف عليها كثري.. يالله اسمحولي ..

ونش خليفه عنهن وطلع ..

سالفة خليفه ماانتهت لين امه ..وام حصه .. السالفه كانت اكبر من جيه ..
اتصل خالد اخو خليفه فيه وقاله ايي لان ابوه يباه ويبونه ضروري..
ياهم خليفه وكان عارف شو يبون منه ..

في هالوقت كانت روضه وظبيه يالسات عند حصه .. حصه كانت وايد متضايقه ..والبنات يهدن فيها ..
ظبيه: حصوه انتي شو فيج.... محد يروم يفرق امبينكم يوم انتي تبينه وهوه يباج محد بيبعدكم..اهلنا يبون مصلحتكم وانتو خربتو على عماركم وااايد..

حصه تقول في خاطرها .. ليت السالفه جيه.. لو هوه صدق يباني محد بيقولنا شي.. وهوه نفسه ماعليه من حد .. المشكله اني اخاف ان خليفه يروح عني.. ويكون هالسبب ياه من الله علشان يفتك مني ...
روضه: حصوه حبيبي خليفه يحبج .. ليش انتي مكبره السالفه .. خليفه بيعرف ينهيهاااا لاتحاتين..

ينهيهاااا..!! ها الي مخوف حصه .. كيف خليفه بينهيها .. !! ااه ياقلبي تعبت .. خلاص مابيدي شي اقوله والا اسويه..

وصل خليفه وسار صوب هله ..حدر عليهم .. وسلم ويلس
بو خليفه : ها خليفه ..شو هالسواه الي مسونها .. فضحتنا وسودة ويهنا عند عمك وبنته..

خليفه : الوالد صبرو عليه وفهمو السالفه .. شي صار بيني وبين حرمتيه ماكان النا يد فيه.. من الاول الموضوع كان في ايديكم وانتو دبرتوه ومشيتوه.. غصبن عن الي ما يبا .. وانا سرت في شوركم وماعصيتكم.. والبنت بعد حافظ عليها ..كانت عاقل وتحملت الي ياها منكم ومني وغصبتونا على هالشي والحينه يوم كدنا رباعه وعقب هالوقت كله ... سمحولي ابى اطلب منكم تخلوني انا وبنت عمي نقرر شو الي نبااااه .. عطونا حريه وخلونا نختار ..

بو حصه: شو تختارون .. الحين هيه حرمتك وانته ريلها ومن زمان عندك ماتفاهمت وياها ..!! الحين ياي تبى اتفاهم وياها ..عقب شوه.. البنت خاست عندك وانته ماجبلت صوبها ..

خليفه: عمي .. انا مانكر اني انغصبت على حصه واني ماكنت اباها .. بس مب معناة هذا اني مااحب حصه ..والا اني مااباهااا لين الحين ..والا اني مرخصنها .. لا وربي شاهد عليه .. اني اغلي حصه واودها واتمنالها الخير من قبل ماتستوي حليله اليه .. والحين انا هالبنت اباها من خاطريه .. واقولكم كلكم اهنيه وانتو يلوس وربي شاهد على رمستيه.. اني احب حصه واريدها و اموت على التراب الي ادوسها بريولها .. وجانها هيه بغتني مره انا اباها مليون ..ومابيفرق امبيني وامبينها غير الموت ..

استراحو كلهم من سمعو رمست خليفه وانشرحت انفوسهم ..وهم يعرفون ولدهم مابعوف ولا شين .. بس ماهانت عليهم حصه انها تنظلم منهم ومن ولد عمها و هيه ساكته وماترمس ..

بو خليفه: انا من رايي نشاور البنت على خليفه وجانها راضيه انها تعيش وياه وتكمل .. تراها عنده .. خلاص كل يختار ابكيفه .. ومحد بينغصب على شي مايباه..

بو حصه: ناصر قم ازقر اختك حصه وخلها تي بنشاروها في الموضوع.. وجان حصه بغت خليفه.. انا ماعندي مانع ..والبنت بكيفها ويا ريلها..

الموضوع الحين صار في ايد حصه ...حصه هيه الي بتقرر اتم ويا خليفه ولا لا..
حس خليفه انه بيموت وبيحيها وهوه يتريا حصه تقول رايها في الموضوع .. شو ياحصه .. شو بيكون رايج ..اخاف انج تجنين عليه وتحرميني منج بعد ما اعلنت حبي لج ..يارب لاتفرق بيني وبينهااا..

دخلت حصه على اهلهاااا ..كانت حالتها وايد تعباانه ..ماكانت تعرف شو يبون منها .. كانت تمشي واريولها غصب اتشلهاااا.. من دخلت طاحت اعيونها على خليفه.. شافته يالس جدام هله ..وكلهم يتريونها .. تمت حصه تطالع خليفه.. وخليفه من دخلت حصه على طول التفت صوبها و طالعهاااا.. فديت اعيونك ياحبيبي .. عذبوك وعذبوني .. شو يبون منا ..كنا عايشين ومرتاحين ..ولو اننا كنا بعاد عن بعض بس كان يكفيني وجودي وياك في بيت واحد واني اشوفك واحسبك واشوف اعيونك واعيش وياك..

مشت حصه صوب ابوها ويلست حذاله ..
بو حصه: حصه بنتي ..امورج انتي وخليفه بانت كلها النااا .. وماشي تم تغبونه عنا.. والحين انحن يمعناكم ..والحين بيتقرر حالكم .. يااتمون رباعه يا تفترقون ..

بو خليفه: بنتي حصه .. تبين ولد عمج ..والا لا؟ الشور عندج

[SIZE="5"]الجزء السادس والاخير ..[/SIZE]
خبروه اني على وصله حييت ... وان تفارقنا ترا موتي دناا
لي حبيب يوم روح ماسليت .. يعلم الله تو ماذقت العنااا

لا حياة عقب محبوبي رإيت .. والممات ارحم ولا فرقا السنااا
هوه سنا شمسي وغيره ماهقيت ... يفرح ابوصلي ولو موته دنااا

مرتت الايام .. وانقضت.. وحصه تصيح خليفه ..خياله مافارق تفكيرها ..حصه تعبت ونحل عودها وانعزلت على نفسها حزن وبكا على خليفه..

اهلها عجزو انهم يطلعونها من الي هيه فيه .. كانت ماتكلم اي حد فيهم .. والاكل يدخل غرفتها ويطلع مثل ما هوه .. حصه ماتقدر تعيش بدون خليفه .. تصبر نفسها وذكرى خليفه تزورها كل حين ..... ااه ياقلبي وين خليفه الحين ... وشو حاله ..؟؟ وشو يسوي عقبي .. ؟؟

زاد حال خليفه سوء وتعب من فرقا حصه .. خليفه انجرح من قرار حصه .. قرار حصه نزل على خليفه مثل النار .. نار قضت على خليفه وانهت بلهيبها امال خليفه واحلامه في حصه..
تم خليفه وحيد بعد حصه .. يمشي في البيت يتلفت ..كل شي في بيته يذكره بحصه .. كل مايلتفت في ركن يحصل خيال حصه فيه... غرفتها والكنبه في الصاله الي دايما تيلس عليها.. كان يسمع صوتها يتردد في البيت يفز يتلفت يقول حصه ردت .. حصه غيرت رايها ورجعت لي .. بس مايلقا حد .. ليش ياحصه .. انا في شوه قصرت وياج..؟ حبي ترجمته لج بكل الطرق .. حبيتج زود عن الناس ماحبت .. وهبتلج عمري وحياتي .. كيف قدرتي على بعدي .. كيف طاوعج قلبج تخليني .. انا منو اليه غيرج ..!! شو اسوي بحياتي الحين ..؟؟ العمر مااباه بدونج يالغلا.. انا الموت اهون عليه من حياه ماتكونين فيها .. ونور عيني وش حاجتي فيه وانا عيني ماتشوفج.. ليش خليتيني ياالحص .. ليش .. ليش ..!!

محد يقدر يلوم حصه على قرارها .. حصه كانت تعتقد انها قررت الشي الصح الي بييريح خليفه وبيحافظ على كرامت اهلها قبل كرامتها ..
حصه ما كانت تعرف ان خليفه اعترف بحبه الها جدام الجميع.. ومحد بغى يقولها ..لانهم ماكانو يبون يضغطون عليها بهالشي او انها توافق على خليفه شفقه عليه .. كانو يبونها تختار الشي من كيفها بدون اي ضغوطات ..

كانت تشوفه يالس في مكانه .. وكانت تنتظر منه اشاره علشان تي صوبه وتلمه وتقوله انها تحبه وتباه ومستحيل تخليه.. بس خليفه كان ينتظر قرار حصه ..بخوف وقلق.. كان خليفه يطالع حصه وفي عيونه رجاء وكلام وطلب ... كان يبى منها قلبها .. حبها .. حياه يديده يبدونها من الاول ..ويترجاها توافق انها اتم وياه وماتختار لفراق.. الي عذب خليفه وجتل حاله ..طلبها بعيونه وبروحه بدون ماينطق .. ترياها ترمس .. ترياها تقول انها تباه وماتقدر تخليه..
بس حصه ترجمت هذا الرجاء بصوره عكست فيها كل الي كان يطلبه خليفه منها بعيونه.. كانت متردده وحايره وخايفه ... شو الي تطلبه من ياخليفه .. وعيونك هذي الي تناظرني شو تبى تقولي .. ليتني اقدر افهمهن .. دموع حصه كانت تنزل ونفسها بدا يتقطع ..كانت حصه تطالع خليفه ماتقدر تنطق ابشي .. كانو اهلها يتريون قرارها الي حبس صوتها وماقدرت تنطق به .. حصه تعذبت وايد والي عذبها اكثر عيون خليفه الي كانت تطالعها بكل قلق .. خذت حصه وقت طويل وهيه تبى تتكلم بس مب قادره .. ماكان شي سهل الي طلبوه اهلها منها .. فراق خليفه كان يجتلها ويحيها ويرد يجتلها ..

خليفه انعزل عن الناس وقطع هله وحب انه يعش مع ذكرياته ويا حصه في بيتهم .. وحصه انعزلت في غرفتها ماتبى حد يكلمها ولا حد اييها ..

ام حصه: بو محمد انا خلاص حالي تعب ومااقدر اشوف حصه وهيه تجتل عمرها بهالحاله.. سر رمسها وظهرها من حجرتها .. البنت بتروح من ايدينا وانحن يالسين ونطالعها ..

كانت ام حصه تصيح وهيه ترمس ابو حصه .. شو تسوي حصه ضناها ماتقدر تشوفها في هالحاله.. وبو محمد كان شال هم حصه الي ثقل على قلبه وبان على حاله..

بو محمد: رمسه ورمسناها ومحايل وحايلناها شو تبيني اسوي .. البنت صاكه على عمرها وانا اشوف اننا نخليها.. هاي فتره صعبه عليها ..تبالها وقت لين ماتنسى الظروف الي مرت عليها وتردلنا حصه القبليه..
ام حصه: فديت روحج يابتي اسمينا عذبناها بهالعرس ..البنت اصغيره وانحن استعيلنا عليها . يالله يارب تسامحنا..
بو محمد: هذا قدر وانكتب .. وهذا نصيبها .. ولو بنلوم اعمارنا في هالشي الي استوى .. تراه كله مقدر وانحن مانروم انرد شي راح..

في هالوقت روضه وظبيه ين يسلمن على حصه ويشوفنها .. دخلن ولقن ام حصه وابوها على حالهم هذا ..

سلمن روضه وظبيه ودخلن ..
ظبيه: شحالج خالوه وشحال حصه الحين..؟؟
ام حصه: حالنا من حال حصه وحصه حالها لايسر لاعدو ولا صديق ..
روضه: هيه بعدها مب طايعه تظهر من حجرتها ..؟
بو محمد: لا يابتني الحص ماتظهر من حجرتها وجانكن ترومن تظهرنا وتيبنها عندنا طلعلها حجرتها وشوفنها..
روضه: انشالله عمي بنسيرلها وانشالله نقدر نظهرها .. الحين صارلها اسبوعين على هالحاله ..مايصير نخليها جيه..
ظبيه: فديت روحج ياحصوه ..والله وخليفه بعد ذابح عمره عقب حصه.. مادري ليش استوابهم جذيه..!!كانو وايد مرتاحين ومستانسين .. الله يعينهم ويصبرهم ..
طلعن البنات عند حصه ودخلن عليها ..لقنها منسدحه على الكرسي ومغطيه ويها بيديها.. وحالها ذاوي وهلكانه الي كان يشوفها كان يقول انها وحده مودعه الدنيا ومالها حايه فيها..

روضه: حبيبي حصوه قومي فديتج نبى نيلس وياج.
انتبهت حصه لبنات عمها ونشت سلمت عليهن.. و يلسن ..تمن روضه وظبيه يطالعن حصه بعيون كلها حزن ..
كانن يبن يظهرن حصه من جو الحزن الي عايشتنه .. يبن ينسنها خليفه وحزنها عليه.. كان قلبهن يعورهن على حال حصه وحال اخوهن عقبها..
كانت حصه تطالع بنات عمها واعيونها تفرح بشوفهن.. كانت تشوف خليفه فيهن .. ملامح ويهه ولون شعره ونبرت صوته .. ااااه ياخليفه وينك الحين.. مااقدر اتحمل البعد.. ليتني اموت الحين وتعيش روحي معاك.. تنام معاك وتقوم معاك وتسهر معاك ..

روضه: حصوه حبيبي تعالي ننزل تحت عند اهلج .. وايد مستهمين عليج.. تعالي علشان تريحينهم مب زين جذيه..
حصه: الاهل !!..انا هلي راحو مابقالي حد .
ظبيه : الحص عيوني اذا ماتبين تشوفين حد .. تعالي بنتمشى تحت في الحوش ماظقتي من يلست هالحجره..
تمت حصه ساكته وتفكر .. كان نفسها تسألهن عن خليفه..؟؟ تبى تعرف كيف عايش حياته بدونها .. مستانس ..!! يشتاقلها..!! ولو هوه عايش حياته اكيد انه بيشتاقليه .. انا بنت عمه.. والوقت الي قضيناه مع بعض مب شويه.. ايامنا وسوالفنا كلها راحت .. بس المعزه بتبقى ولو احنا ابعيد..

حصه: روضه ..ظبيه.. شو حال خليفه.؟
روضه: يهمج حاله ياحصه...؟؟
حصه بكل شوق وحب ولهفه : ومن في هالدنيا يهمني غير خليفه .. وش فيها الدنيا غير خليفه..!!
بكن اعيون حصه .. وسالت ادموعها من تكلمت عن خليفه ويابت طاريه ..
روضه : لو كان خليفه يهمج ماكنتي بتخلينه بتعذب ..حصه خليفه منهار .. حصه خليفه تعبان وانتي الي تعبتيه.

فديت روحك يابعد روحي وكلي .. ليتني اموت واريحك من عذابي وهمي .. اكيد انته شال همي ومتعذب علشاني..ليتني اقدر اشوفك والله اشتقت لك موت .. اشتقت لعيونك وويهك وايديك ونفسك وكل شي فيك..

ظبيه: حصوه .. بس عاد صايح .. ماخلصت ادموعج من اسبوعين وانتي مهلكه عمرج صياح..ليت خليفه يشوفج والله مابيخليج في هالحاله..

خليفه ..!! كل ماينطقن بسم خليفه قلب حصه يفز من مكانه.. لو خليفه يشوفني ..!! ليتك ياخليفه تشوفني واشوفك.. كنت ببرد نار الشوق .. بس ولو بشوفك كيف بجابلك ..كيف بحط عيني في عينك.. اكيد بنتذكر ايامنا وحياتنا قبل.. بتشتاقلي ياخليفه..!!؟ بتشتاق لايامنا قبل..!!؟

محد قدر يغير حال حصه .. والبنت بتموت ان تمت جذيه.. ماقدر ابوها يسكت اكثر ..كان لازم يتصرف ويشوفله حل ويا بنته..
سار بو حصه بيشوف حصه وبيحاول يرمسها.. مب زواج هذا الي زوجوها اياها وخالها جذيه.. بو حصه كان يقول اكيد السالفه اكبر من جيه ..والا حصه مابتموت على واحد ماكن يباها وجرحها وعذبها..

دق بو حصه الباب على بنته ودخل .. نشت حصه سلمت على ابوها ومسك بوحصه بنته وسار ويلسها على الكرسي ويلس عدالها..

بو حصه: الحص بنتي .. حالج هذا طال ..ولابد انج ترمسين وتقولين الي في نفسج.. انا ابوج واعرفج .. مب حصه الي بيذبحها ريال ما قدرها ..مب حصه الي بتصيح واحد جرحها .. بنتي مب ضعيفه .. حصه الغلا خبريني انا ابوج..
حصه : الوالد لاترمس عن خليفه جيه.. خليفه طيب ..خليفه ما أهاني ولا جرحني ..خليفه كان طيب ويايه..خليفه ماله ذنب بالي استوابي ..
بو حصه: عيل شو بلاج يابنتي ..ريحيني ريحي ابوج.. اهون عليج معذبتني ومعذبه امج.. انحن مانبات الليل خوف عليج.. نخاف ان يستويبج شي لاسمحا الله والا انج تنفدين من بين ايدينا..

حصه ما هانو عليها اهلها بتعذبون يكفي عذابها على خليفه.. وحرمانها منه..ماتبى شي يستوي بهلها ماتتحمل فراق حد من اهلها والا عذابهم عليها..

حصه: ابويا انا ما اتحمل ها الي يستويبي كله.. ابويا انا خلاص تعبت من حالي ..
نزلن ادموع حصه ماقدرت تمسكهن ..ماتقدر تسكت اكثر من جيه ..حصه تبى تبوح لبوها بحبها لخليفه وعذابها من فراقه..
حصه: ابويا انا مااقدر اعيش بعيد عن ولد عمي ..ابويا انا اتعذب من فرقا خليفه ..

ماقدرت تكمل كلامها ..
كان ابو حصه يطالع بنته ..ومب هاينه عليه كيف ان حصه حبت ولد عمها وتباه وكيف انها تايهه في هالدنيا وحيده... محد قدر يساعدها والا يدلها على طريقها.. كل ماكانو يبون يسون شي علشان حصه كانو يضرونها به.. تقطع قلب ابو حصه على بنته.. كيف يابنتي لعوزناج.. مره نوديج لولد عمج ..ومره نشلج عنه.. فديت قلبج انا الي تحمل هالعيشه وماشتكى ..
لوا بو حصه على بنته.. وتمت حصه في حظن ابوها ترتاح من تعب هالوقت الي مارحمها..حصه كانت تبكي ولد عمها ..وتبكي حالها عقبه.. وتبكي من الدنيا الي مارحمتها ..

بو حصه: بنتي شو الي حدج على لفراق يوم انتي تبين ولد عمج..؟؟ شو الي قسى قلبج وخلاج تودرين ولد عمج.. انحن خيرناج ولا حاولنا نغصب عليج..شو ياحصه شو ياج على ولد عمج ...؟؟

حصه: الوالد انا ماكان بيدي اختار .. و لو انا احب خليفه واباه .. انا مااقدر اذل عمري وارضى عليكم اني اعيش وياخليفه وهوه مايباني..ابويا انا مااقدر اجبر خليفه عليه .. كنت ابى خليفه يشوف حياته .. كم بيتحملني هوه ..!!

نزلت حصه راسها ..ماتقدر تعذب ابوها بدموعها اكثر من جيه..

بو حصه: الحص الغلا ..تعالي ويايه الحين
حصه: لا ابويا دخيلك انا ماابى اظهر ..دخيلك ماابى اشوف حد
بو حصه : بنتي انتي تبين ولد عمج..؟؟
حصه: شو الا اباااه.. !! الا مالي حياه من دونه..
بو حصه : تعالي بنسير صوب ولد عمج.. انتو غلطتو في حق عماركم وايد.. ولازم تصلحون كل هذا ..
حصه مب مصدقه ان ابوها بيوديها عند خليفه..ليش..؟؟ حصه بتموت واتشوف خليفه.. ااه ياخليفه كم مشتاقه لك .. ودي اشوفك واضمك واموت في حضنك ماابى هالعيشه بدونك ....بس كيف ابويا بيوديني لخليفه ..يمكن خليفه مرتاح مني الحين .. كيف الوالد يبى يوديني عنده عيل ..لا الوالد مابيوديني عند خليفه وخليفه مايباني ..!!
حصه: ابويا ليش تبى توديني عند خليفه وشو هالشي الي تبانا نصلحه..؟؟
بو حصه: حصه بنتي منو قالج ان خليفه مايباج والا انه مايحبج.. !!؟حصه يابنتي خليفه مب بس الا يحبج.. خليفه يموت فيج وقالنا هالرمسه من ثمه.. ويوم خيرناج خليفه قالنا ذاك اليوم انه مستحيل يفترق عنج وان الموت اقرب له من الفراق ..
تمت حصه امبهته في ابوها مب مستوعبه كلامه .. خليفه يحبني .. يموت فيه.. خليفه ماكان يبى لفراق.. لا مااصدق ..كيف وليش ماقالي هالشي بنفسه .. كيف ..!!
مسكت حصه ايدين ابوها وترجته: الوالد دخيلك قولي ..صدق هالكلام ..والا انكم تبون تطلعوني من هالحاله الي انا فيها ... وتقولي جذيه..؟
بو محمد: وغلاتج عندي ياحصه وغلات اخوانج ان هالرمسه هيه رمست خليفه.. ولو الا على حالتج هاي لو اتمين فيها طول عمرج.. ولا افرج على واحد مايباج..

تمت حصه تطالع ابوها وادموعها تسيل على خدها .. مب عارفه شو تقوله.. شو الي سويته انا خربت كل شي جنيت على خليفه وعليه.. ااه ياربي شو حال خليفه من عقبي .. وخليفه يحبني .. مثل ما انا احبه.. !!فديت روحك ياحبيبي عذبتك فرقت امبين قلوبنا .. شو بقولك الحين .. كيف بتسامحني على الي سويته..
حصه : ابويا ودني لخليفه الحين ..الحين الحين ..دخيلك الوالد

شل بو حصه بنته ووداها بيت خليفه.. دخل وياها البيت .. كان البيت موحش وفاضي وماله حياه.. طالعت حصه البيت .. اااااه كم اشتقت لبيتي .. حصه كانت ادور بعيونها ..تطالع يمين يسار ..تبى تشوف خليفه.. وابوها كان واقف وراها ..يبى يسلمها لريلها ويخليها ويااه.. يتفاهمون ويحيون اقلوب بعض عقب هذا لفراق..

حصه: ابويا مااشوف خليفه وينه..؟
كانت حصه ترتجف من الوله على خليفه.. مشتاقه له ..مب مصدقه انها بتشوف خليفه وبترمسه وانا خلاص بترجعله نهائي وللااابد..
بو حصه: دخلي داخل شوفيه..
سارت حصه دورت خليفه ..ماحصلته.. ردت لبوها ..كانت خايفه..
حصه: محد ..مالقيته .
بو حصه : لاتخافين بيي .. شو تبين تيلسين تتريينه والا انسير الحين ونرد بعدين..؟
حصه: لا ماابى اسير ..انا بتريااا خليفه.. اكيد هوه بي الحين مابيتأخر ..مااريد اطلع من اهنيه وانا ماشفت خليفه .. انا بيلس اترياه
بو حصه: مااقدر اخليج اهنيه واسير عنج.. اخاف ان خليفه مايرد البيت والا يتأخر .
حصه: لا اكيد هوه مابيتأخر ..احساسي يقولي انه بيي الحين .

يلست حصه تتريا خليفه بعد ماسار عنها ابوها ..يلست في الصاله ومر الوقت وماحست بعمرها ..كانت فرحتها كبيره برجعتها لخليفه.. كانت تفكر في الكلام الي بتقوله لخليفه.. كيف خليفه بيفرح بشوفتهاا .. يالله يارب هاتلي خليفه بسرعه.. مااقدر ايود شوقي اكثر عن جيه..

حست حصه بيد تمسح على شعرها وهيه نايمه على الكرسي .. بطلت اعيونها .. شمت عطر خليفه.. رفعت اعيونها وشافت ويه خليفه.. شافت اعيونه .. شافت ادموع خليفه تنزل من اعيونه .. فديت اعيونك ياحبيبي ..وحشتني و وحشتني عيونك وويهك الغالي .. خليفه تفاجأ بحصه عنده.. كانت مثل الحلم .. معقوله يحصل حصه عنده ..في بيته..شو الي يابج في هالوقت ياحصه.. ياترا شوقج الي يابج.. !! والا شوه!! ..واهلج يدرون بج انج ييتي عندي..

حصه: خليفه..وينك انته عني ..
خليفه: انا .. انا كنت عندج وكنت ما افارقج دقيقه ..بس انتي الي ابعدتيني عنج يالغاليه..

شو سوى فيك الوقت يابعد روحي .. حالك نحل .. وذوا ... كان خليفه بعد لفراق مريض ..كان ضعيف .. وحاله مايسر حد مول ..
تم خليفه يطالع حصه بكل لهفه وشوق وحنين الها ..وحصه كانت ودها لو تختصر كل الكلام الي بيقولونه ..وتحط نفسها في صدر خليفه وترتاح عقب هذا العنى كله..
رفعت حصه ايدينها لخليفه.. وبدون تفكير تقرب خليفه منها واخذها في حضنه.. بكت اعيون حصه وبكت اعيون خليفه ..

حصه: خليفه انا اسفه ..عذبتك يا بعد روحي ماكنت ادري ..ما كنت اعرف.. سامحني..
خليفه: حصه عمري يفداج وانتي لاتعتذرين مول لاتعتذرين انتي لو تذبحيني واموت لاتعتذرين انا مسامحنج بطيب خاطر واموت فيج..
حصه: بسم الله عليك يابعد روحي ..انشالله افداك وياخذني الموت قبل لا ياخذك ..
خليفه: إإإشش ... لاتقولين جيه .. انتي ماتدرين ان العمر بلاياج مامنه فايده.. والروح تتبعج وين ماتكونين .. خليني اهتني وياج.. خليني ابرد حرقت قلبي من فراقج..
تملكت حصه السعاده ..من شوفة خليفه.. ردت الها الروح عقب شوفه .. وخليفه ارتوت اعروقه من شوفت الحص ماكان وده انه يفجها من ايديه..
خليفه: حصه ..اهلج يدرون انج عندي الحين..؟
حصه : هيه يدرون.. وابويه هوه الي يابني اهنيه..
خليفه مب مصدق ..
خليفه: كيف..؟
حصه: خليفه.... انا بس اليوم عرفت انك قايل لهليه واهلك انك.. انك تحبني .
خليفه فج اعيونه في حصه.. معقوله ..معقوله الحص محد خبرها ..!
خليفه: وهذا الشي خلاج تغيرين شعورج ناحيتيه..؟؟
خليفه كان يرمسها وعيونه تتقرب من اعيونها وده يشوف الشي الي رد حصه له في عيونها ..
حصه: في شي ثاني بعد ردني ..
خليفه ..بكل شوق ووله : شو هوه..؟؟
حصه: لاني كنت بموت بدونك ياحبيبي ..ماكان باقيلي شي وكنت بنتهي .
خليفه: حصووه..
حصه: لبيه يابعد روح حصووه..
خليفه بجنون : احبج .. حصوه اموت فيج .. مب عارف شو اسوي انا بجن من حبي لج ..ريحيني حصوه..
حصه بشوق : خليفه احبك .. (وقالت له وبكل دلال ) يريحك هالشي ..؟

النهـــــايــه
م
ن
ق
و
ل

حَتْى Google عجَز
لَــ يجِيــبْ أَخ ـبَـارَهْـ

•••

مواقع النشر (المفضلة)

« الموضوع السابق | الموضوع التالي »

الذين يشاهدون محتوى الموضوع الآن : 1 ( الأعضاء 0 والزوار 1)

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة قوانين المنتدى

الانتقال السريع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لقب اللقب اللي يعجبك للعضو اللي بعدك	فارس الفرسان	برج المسابقات والألعاب والألغاز	148	15-07-2008 01:25 PM
لعبة Winning Eleven 9 كاملة	الزعيم	برج الحاسوب والأجهزة الإلكترونية وبرامجها	6	25-04-2007 01:33 AM
لعبة Neighbours From Hell 2 كاملة	البراء	برج الحاسوب والأجهزة الإلكترونية وبرامجها	10	13-03-2007 08:28 PM
اختر صورة العضو اللي في بالك وعلق عليها(اللي يزعل لا يدخل)	دفئ الكون	برج المسابقات والألعاب والألغاز	71	24-08-2006 12:03 AM
°l\|\|l° أسماء أشهر اللاعبين كاملة °l\|\|l° مع تاريخ ميلادهم°l\|\|l°	امبراطور بوظبي	البرج الرياضي	3	26-06-2006 02:25 PM

الساعة الآن 03:26 AM.